近排發水樓成為熱門話題，不過呢家嘢絕對唔係地產商嘅專利，港府嘅發水工程仲離譜，唔止涉及金額龐大，仲可能成為一隻隻大白象添。
工程發水唔係指面積，而係成本，發水幾成不過係小兒科，狂飆成倍一啲都唔出奇。呢，港鐵南港島線仲未動工，造價估算就已經升咗五成半，肯定超過一百零八億，原因係物價及工程成本上漲喎。呢條短短七公里嘅鐵路，○六年估價不過係七十億，短短四年就多咗三十幾億，問你怕未。
唉，政府第二樣唔叻，至出名就係議而不決，決而不行。南港島線話就話明年動工，但冇人知到時會唔會又有變化，好話唔好聽，到真正開工嗰陣，造價分分鐘又唔止呢個數。
話時話，港府作為港鐵最大股東，應該幫納稅人睇住個荷包，對工程預算同進度到實至啱數㗎！講開基建，功夫茶直頭火都嚟埋，當局成日吹噓乜嘢十大工程，試問依家究竟有幾項開咗工？有幾項仲喺度紙上談兵？又有幾項唔係因為拖延而導致造價一漲再漲吖？
相信大家應該仲記得舊年吹到滿城風雨嘅「高鐵風波」，呢條短短二十六公里嘅鐵路，最初估價唔使四百億，到拍板興建已漲到六百七十億，平均每公里造價超過二十五億，睇怕已創下世界紀錄，搞到「八十後」齊起反對，連立法會議員都「嘩嘩」聲，幾乎否決撥款議案。
港鐵沙中線係另一個發水例子，因為遲遲未拍板，造價一開始估計係三百八十億，工程落實嗰陣，已經變成六百億有多。啟德郵輪碼頭同樣誇張，○六年做規劃，造價只係三十六億，○八年當局決定自資興建，但成本已經翻咗一番，要七十億至搞得掂，問你服未？
工程拖延唔止令成本急升，因為錯失良機，經濟效益同競爭力下降造成嘅損失，根本無法計算。好似港珠澳大橋咁，上個世紀八十年代初已經提出，拗足二十幾年至落實興建，舊年至開始動工，預計二○一五年先至有望通車。
同樣係跨海大橋，上海至寧波嘅杭州灣大橋○三年拍板動工，○九年已經啟用，為促進長三角地區經濟發展發揮巨大作用。無論講效率定講效益，港珠澳大橋都差天共地。
講番南港島線呢筆，港鐵淨係發展黃竹坑一塊海景靚地嘅上蓋物業，收益估計至少有二百幾億，遠高於最新估算嘅工程成本，唔怪得港府將原來準備交畀港鐵發展上蓋物業嘅另一幅土地收起。講真，港鐵興建南港島線項目幾乎肯定有賺冇蝕，如果港府唔收起呢塊地皮，納稅人都唔肯喇。
其實，無論撥地又好，撥款又好，都係公共資源，港府應做嘅係加強監督，唔係繼續無了期拖延工程，令成本變成無底洞。