特區政府有意一擲四百幾億申辦二○二三年亞運會，民政事務局局長曾德成誓神劈願話唔會出現「大白象」。大家明唔明乜嘢係大白象？大白象係好神聖嘅，神聖到唔准宰殺又禁止勞役，假如有人送一隻大白象畀你，你慘咯，驚人食量足以食窮郎。簡單咁講，大白象極度昂貴，可惜華而不實，而且保養費用係無底深潭。
四百幾億辦一屆亞運，局長大人一味死撐啫，好多人已經認定呢隻係大白象，所以反對聲音十分浩大。如果你以為香港只會出現一隻亞運大白象，你錯嘞，淨係港鐵手頭上已經起碼有三隻咁多。
第一隻大白象叫做廣深港高速鐵路。如果大家唔善忘，應該記得舊年反高鐵反到七國咁亂，反對嘅其中一個最主要原因係造價太貴，盛惠六百七十億。短短二十六公里路程，平均每公里建造費用二十五億，睇怕係世界紀錄。
第二隻大白象叫做沙中線。呢條沙中線遲遲未上馬㗎，不過造價升完又升，最初估計係三百八十億，早兩個月估計已大幅飆升五成八，變咗超過六百億。嗱嗱嗱，又係六百億呀，沙中線同高鐵簡直係難兄難弟。
第三隻大白象叫做南港島線。呢隻嘢表面上情況好少少，實際上同樣貴到飛起，原先估計造價係七十億，家陣調高到超過一百億。計一計升幅比例，瘋狂飆升五成半呀大佬！
姑且唔講高鐵吖，因乜事幹沙中線同南港島線會超支到阿媽都唔認得？物價上漲喎，設計改動喎，總而言之諸多藉口。
港鐵呢三隻大白象加起上嚟成本就係一千三百幾億，功夫茶問問你，錢從何來？當然係納稅人荷包啦，鬼叫政府係港鐵大股東咩。好嘞，功夫茶再問問你，建造成本貴得咁交關，日後票價安排會唔會羊毛出在羊身上呀？乘客嘟一嘟八達通之後，會唔會已經窮到冇錢開飯呀？
關於南港島線嘅超支問題，港鐵話喎，票價有既定機制釐定，興建成本上升不會影響票價。講就係咁講，可惜功夫茶硬係覺得難以置信。你知啦，港鐵見利忘義都唔係第一次㗎嘞，冇耐之前先至加價之嘛。今時今日話興建成本上升不會影響票價，放長雙眼睇下啦，怕且落成之後當你羊牯咁劏！
即係咁，一隻一隻大白象，港鐵超支食窮郎。如果你係納稅人，你首先要為工程超支埋單；如果你係乘客，日後隨時受盡票價高昂之苦。
好心曾德成咪再搞搞震啦，申乜鬼嘢辦亞運？莫非嫌香港大白象仲唔夠多？留番四百幾億做啲更有意義嘅事好過啦，譬如話扶貧，譬如話養老，再譬如話投放多啲教育資源，唔好亂咁殺校，唔好亂咁縮班，咁先至叫做用得其所吖嘛。
再講吖，官場如港鐵，超支成習慣，你家陣話亞運經費四百幾億啫，冇人能夠保證遲啲會唔會變咗過千億。納稅人賺錢好辛苦㗎，真係有血有汗㗎，好心唔好咁敗家啦！