混帳混帳真混帳！中國人話就話寸土不讓，不過好多時候矜貴土地竟然可以無端白事拱手相讓！
咦，功夫茶係咪講緊國仇家恨保釣運動？非也，神聖領土被侵佔嘅釣魚島雖然都係一筆夾纏不清糊塗帳，不過荒謬程度點都及不上特區政府嘅敗家行為。功夫茶講緊嘅係尖沙咀一個政府物業，有人涉嫌冒充業主公然出租圖利，維時長達兩年之久，地政總署一直懵然不知，如果唔係東方報業集團記者窮追猛打，政府都唔發覺有必要收回物業。鵲巢鳩佔大家聽得多，地政總署就好比一隻傻更更嘅鵲，被侵佔業權都唔知發生乜嘢事。
不如咁，等功夫茶慢慢講過畀大家聽先啦。
尖沙咀加連威老道有一間地舖，面積雖然比較細，闊兩呎幾，深十幾呎，典型嘅港產豆腐膶。不過你知啦，地少人多嘅香港寸金尺土吖嘛，骨灰龕位呎價閒閒地貴過陽宅，所以豆腐膶舖位都相當值租㗎，市值大約八百萬元，月租都要一萬五千。
呢個地舖本來係私人物業，原業主係一間公司，不過○三年十月十日該公司被公司註冊處除名。既然公司除名，物業等於丟空，根據現行《公司條例》，但凡「無主物業」嘅業權撥歸政府所有。換言之，政府已經係地舖嘅新業主。奇怪嘅事喺兩年前出現，有人以○三年除名嘅公司名稱重新註冊，自稱係業主將舖位出租，租客係一間找換店東主，兩年以來收租圖利。
你話係咪老虎頭上釘虱乸？真正嘅業主係政府，居然有人夠膽假扮收租佬，變相賺取公帑。荒謬絕倫嘅就係，老虎原來係病貓，畀人釘咗虱乸都唔知呀，該煨！
唉，講真，功夫茶比較同情嗰一位找換店東主。身為租客嘅佢，鬼知真業主係邊個打邊個咩，萬一地政總署如夢初醒走去收回物業，損失慘重咯，喊得一句句！
政府類似嘅敗家行為唔係第一次㗎喇，最極端事例由審計署前年踢爆。有三個分別位處北角、西環同上環嘅政府物業喎，本來係預留畀港鐵作為出入口之用，可惜留來留去港鐵硬係唔用，三個物業就咁一直丟空。你估丟空咗幾耐吖嗱？答案係，三十年！丟空期間假如用嚟出租，收入不知幾和味！
至於教育局，唔好以為負責作育英才就好聰明呀，其實智商應該屬於殘障水平。申訴專員揭發教育局一單蠢到冇朋友嘅醜聞，該局將一幅土地批畀一間機構，到頭來居然向該機構出錢租用同一幅土地。打個譬喻吖，功夫茶係桃花島業主，特別恩准東邪黃藥師暫住，功夫茶心血來潮又想上島瞓番幾晚喎，唔通有必要向黃老邪交租咩？霎戇！
講番尖沙咀加連威老道，法律界人士黃國桐形容事件有騙局之嫌。假如真係老千所為，咁就確係醜死怪，堂堂一個政府淪為騙案受害者，地位同一個受騙於祈福黨嘅無知婦孺冇乜分別㗎咋。
物業得而復失，敗家又添一筆，早知功夫茶都走去鵲巢鳩佔啦，呻笨呀！