女人唔補好易老，福利唔爭好易冇。港府一向將長者當包袱，安老承擔卸得就卸，就算畀雞碎咁多，都要諸多設限，市民唔力爭，容乜易臨老唔過得世㗎。
呢，尋日又有幾十位老人家去政府總部請願，要求今年嘅施政報告增加長者福利，包括增加長者醫療券金額同降低領取門檻、放寬生果金離境限制、增加安老宿位及實施全民退休保障等等。
唉，呢類訴求市民年年提，但當局就年年當聽唔到，一於詐傻扮懵，關人個關。好似全民退休保障計劃咁，拖足二十年連影都未見，正如當年有份推動計劃嘅現任平機會主席林煥光話齋，睇勻過去五年嘅施政報告，「退休保障」四個字提都冇提過。
政府做咗乜？巴閉咯，咪搞咗個愈供愈縮水，打一世工都唔夠養老嘅強積金囉。打工仔揼錢入去，淨係養肥咗一班基金經理，旨意強積金養老？發夢都冇咁早！
其實，全民退休保障計劃固然係冇米粥，就算聊勝於無嘅生果金，港府都畀得不情不願，好似施捨咁，真係豈有此理。最令人火滾嘅係，當年港府仲一度想引入資產審查機制，搞到群情洶湧，民怨沸騰，當局見眾怒難犯，先至死死氣認衰。
不過，生果金雖然唔使資產審查，但淨係離港限制一項，就已經難倒唔少老人家。所謂離港限制，即係規定老人家一年內唔准離港超過二百四十日，否則就要按比例扣除，如果長住內地，仲一個崩都冇添。
最荒謬嘅係，老人家每個月領區區一千元生果金就諸多設限，但退休公務員喺海外領長俸就完全唔受限制，呢啲究竟係乜嘢法例嚟㗎！長者退休後返內地生活，過咗時限就唔得，公僕退休遷居國外，長俸一個崩都唔會少，唔通公僕高人一等？唔通外國月亮比中國圓？
公僕高薪厚祿食過世，孤苦老人攞一千元生果金，畀政府審查呢樣，限制嗰樣，直情仲慘過去乞。喂！香港回歸十三年有多，你以為家陣仲係掛緊米字旗，港英餘孽惡晒，可以享受特權咩！
敬老係中國人嘅優良傳統，生果金係社會對老人家嘅一點心意，絕對唔係政府嘅恩賜同施捨。試諗吓，如果冇公公婆婆畢生嘅貢獻及付出，香港點可能成為國際金融中心吖，高官坐享其成唔飲水思源，反而歧視為香港貢獻良多嘅長者，簡直係忤逆！
計功夫茶話齋，政府坐享兩萬幾億元儲備，卻對長者斤斤計較，涼薄到冇朋友。退休公僕做寓公，回鄉老人要捱窮，港府不公不義，歧視老人家，平機會仲唔快啲做嘢！