與其富翁多 不如窮人少

咦咦咦，咪住先，愈來愈多有錢人到底係好事定係壞事？對於大部分貪慕虛榮嘅港女嚟講，當然係好事啦，「嫁個有錢人」嘅終身事業更加容易夢想成真吖嘛，之不過咁，對於大部分普羅市民以至於窮苦大眾嚟講，呢家嘢未必係好事。

不如咁啦，等功夫茶先同大家介紹一份財富報告，睇睇香港到底有幾多富豪一族。

美林全球財富管理聯同凱捷顧問公布亞太區財富報告，香港擁有一百萬美元，即係七百八十萬港元流動資產嘅富豪，截至去年底有七萬六千人，較前年增加三萬九千人。所有富豪加加埋埋嘅身家達到三千七百九十億美元，折合近三萬億港元。呢兩個數字嘅升幅都係全球最高，主要受到股市及房地產帶動，香港有錢人數目以及財富總值，去年升幅均超過一倍。

好嘞，香港有錢人數目以及財富總值嘅升幅冠絕全球，幅度達到一倍咁勁，點解未必係好事呢？即係咁，大家睇睇財富來源，撇開股市姑且不論，主要係房地產呀。簡單咁講，樓市狂升吖嘛，有貨揸手嘅業主只要善價而沽，閒閒地榮升百萬富翁，話唔定做埋千萬富豪。既然房地產係主要財富來源，即係樓價貴到冇朋友，窮苦大眾莫講話要瞓天橋底，普羅市民同樣苦不堪言，一來唔夠現金買樓置業，二來睇住積蓄變相貶值。嗱，假設你手頭上有五十萬，以前你可能有資格買到又殘又舊半層樓，今時今日怕且連一個爛鬼廁所都買唔到，你話係咪積蓄變相貶值吖？

房地產之所以搞到鑊氣沖天，瘋狂炒賣固然係罪魁禍首，政府出招無力亦係關鍵所在。當然啦，老懵董嗰一套「八萬五」政策係行唔通嘅，不過冇人叫政府翹埋雙手乜都唔做喎。遏抑樓市出招無力都算嘞，最可惡嘅係市建局火上澆油，舊樓重建之後新盤開售動不動都話萬幾元呎價，你叫升斗市民點負擔得起呀！

貧者愈貧、富者愈富呢八個字聽落好似陳腔濫調，可惜現實世界的而且確就係咁，難怪蝸居一族怨聲載道，又難怪「八十後」叫苦連天。所以咯喎，仇富情意結愈來愈嚴重。

講到仇富情意結，不得不提自由黨前主席田北俊早前一篇備受關注嘅文章。田少話呀，特區政府係孤寒成性守財奴，取之於商冇用之於民，商家年年納稅，政府唔肯扶貧，害到有錢佬食死貓。

嗱，有錢佬係咪食死貓尚待研究，畢竟為富不仁嘅奸商真係好多吖嘛，不過政府孤寒就肯定o架嘞。政府坐擁二萬億儲備居然一毛不拔死都唔去救濟窮苦大眾，反而好大喜功情願一擲四百幾億申辦亞運，簡直荒天下之大謬！

計功夫茶話齋，與其富翁多，不如窮人少。假如以後有一份財富報告話畀大家聽，香港百萬窮人大軍已經劇減一半，睇怕大家會開心得多。