近排最惹火嘅官場人物，非環境局局長邱騰華莫屬。呢位高官好大喜功，罔顧民意，為做騷周圍點火，卒之燒着後欄，玩火自焚，正一唔衰攞嚟衰。
惹火尤物最新搞作，就係擴建將軍澳堆填區計劃嘞。諗住大石壓死蟹，一味靠嚇要立法會放行，將清水灣郊野公園五公頃土地擴建成垃圾堆填區，點知激起民憤，成為千夫所指。立法會動議廢除有關法令，各大政黨一面倒支持，政府形勢岌岌可危。
霸王硬上弓擴建堆填區，幾乎演變成一場憲政危機，邱騰華見眾怒難犯，惟有使出一招拖字訣，將法令實施日期押後十四個月，諗住以時間換空間，到時法令「自動波」生效，就可以瞞天過海。點知立法會企硬要廢法，呢個如意算盤睇怕要落空咯。
查實，邱騰華呢招拖字訣唔止蠱惑，仲好縮骨添。嗱，拖多十幾個月，到時本屆政府就快收檔，佢自己亦夠鐘走人，到時關人個關，將呢個計時炸彈留畀下屆政府，你話係咪縮骨呀？你話係咪靠害呀？
話時話，邱騰華都唔係第一次衰啦，佢上台三年以來，所謂「環保政策」推出唔少，可惜藍天白雲見唔到，污染冇少到，反而次次添煩添亂，搞到周圍都係火頭。
最經典梗係慳電膽風波啦。港府舊年根據環境局嘅建議，煞有介事推出每戶派一百蚊慳電膽現金券計劃，點知惹出一場利益輸送風波，差啲引起管治危機添，卒之不得不擱置，計劃無疾而終。邱騰華添煩添亂，專倒港府米，簡直不知所謂。
至於最擾民、最無厘頭嘅政策，都應該係停車熄匙囉。邱騰華閉門造車想出呢條屎橋，完全不切實際，一出台就畀各界剷到飛起。面對愈來愈多嘅批評，環境局焗住一再擴大豁免範圍，搞到停車熄匙仲未實施，就已經形同虛設，最終命運睇怕同慳電膽計劃差唔多，都係胎死腹中。
計嚟計去，邱騰華唯一「貢獻」，可能就係開徵膠袋稅一項咁大把。不過咁，錢就收咗，但唔係用於環保，而係統統入晒庫房，講句唔好聽嘅，係幫港府借環保之名，行斂財之實。係嘞，講到掠水，仲有個電器回收徵費計劃噃，不過當局呢鋪就歎慢板，內地明年開始實施類似法例，但港府家陣仲未攞出具體方案交立法會討論，幾時先至可以實施？四個字：遙遙無期。
計功夫茶話齋，香港環保搞到一鑊泡，邱騰華成事不足，敗事有餘，可以講係罪魁禍首，但奇怪嘅係，身為環境局局長，居然唔使問責。咁兒戲嘅所謂高官問責制，早就應該送去堆填區啦！