擴建醫院係好事定係壞事呢？正常嚟講當然係好事啦，點都冇可能係壞事。之不過咁，香港醫療系統長久以來畸形發展，擴建醫院反而赤裸裸暴露咗一個極之頭痛嘅大問題：人手嚴重不足！
沙田威爾斯親王醫院喎，新大樓陸續啟用，深切治療部ＩＣＵ將於十月二十四日搬至新大樓，病床數目由原本嘅二十二張增至三十二張，增幅四成半。ＩＣＵ病床多咗十張，對於不幸罹患重病或者意外重傷嘅市民一定係好事，大吉利是講句，話唔定可以學似流行歌仔咁唱，來回地獄又折返人間。但係可惜吖，空有硬件，缺乏軟件，威院由於護士嚴重流失，深切治療部病床只有二十張可供使用，莫講話新設嘅十張英雄無用武之地，連舊有嘅病床都有兩張投閒置散。換言之，新大樓ＩＣＵ僅僅有六成功力，差不多半廢武功狀態。
護士人手有幾不足？院方話喎，深切治療部現有九十五名護士，○八及○九年度護士流失率大約百分之四，現時有六個護士空缺，而由於未來幾個月會再有幾名護士離任，預計至今年底流失率將會增至百分之九。
嘩！流失接近一成呀，變相人去樓空呀！功夫茶奉勸各位，真係要好好保重身體，否則醫院未必能夠提供適切服務！
話時話，公立醫院人手不足其實唔止威爾斯，基本上所有崗位都緊張到唔恨。好似以瑪麗醫院為龍頭嘅港島西聯網咁吖，○九至一○年度護士流失率百分之四點六。港島東聯網更加死火，流失率高達百分之六點一。曾經爆出手術室護士集體請病假事件嘅瑪麗醫院，上月底舉行護士招聘會，不惜出動銀彈政策吸納人手，假如成功介紹一名全職護士又獲聘超過半年，可獲三百元超市現金券以及七十周年紀念手錶一隻。可想而知，白衣天使係幾咁吃香。
威院新大樓擴張營業居然捉到鹿唔夠人脫角，名為啟用，實則冇用，固然令人非常擔心呢間醫院嘅服務質素，計功夫茶話齋，其實仲有一個更加得人驚嘅潛在危機。
乜嘢危機呢，老友？嗱，坐穩喇，唔好嚇到抽筋，特區政府好高騖遠嘅官老爺話喎，要將香港打造成亞洲區內醫療服務樞紐，為境外人士提供醫療旅遊服務，吸引外來客人一邊遊山玩水、一邊藥到病除。
問你驚未！大家試諗諗，淨係一間威院擴建新大樓啫，已經出現十個煲得六個蓋嘅尷尬場面，萬一香港真係變身醫療服務樞紐，即係大量增加私家醫院啦，人手何來呢？一定唔係石頭爆出嚟啦，一定唔係天上跌落嚟啦，梗係向公立醫院高薪挖角啦。到時咯喎，十個煲睇怕剩番三個蓋。
喂喂喂，咪住先，幾乎講漏一個重點。食物及衞生局局長周一嶽咪煞有介事硬銷醫療保險嘅，先唔理到底係咪「天仙局」搵人笨，假設落實醫療保險，梗係要私家醫院增加服務㗎啦，人手又何來呀？唔使多講喇啩，自必然又係向公立醫院埋手。
所以話啫，香港醫療系統喺周一嶽管治之下確係亂七八糟，你唔去大力培訓醫護人員，畀你再多醫院啟用都冇鬼用啦！