導遊阿珍一鬧成名天下知，莫講話神州大地無人不曉，家陣連歌仔都有得唱，一曲《導遊珍》將佢嘅偉大事迹唱到街知巷聞，阿珍金句琅琅上口：我給你吃我給你住，但是你們不付出，你這輩子不還，下輩子也要還出來……
頌歌飄飄處處聞都未算巴閉，成個旅遊業生態都因為導遊阿珍而改變。旅遊業議會向商務及經濟發展局局長劉吳惠蘭交報告，提出十項建議，目的係趕絕阿珍之流嘅強迫購物。
十項建議係乜東東呢？主要分開三大範疇，一係規管導遊，二係規管旅社，三係規管店舖。至於具體內容咯喎，包括規定一團一導遊，以免失驚無神跳個「刀手」出嚟劏到遊客一頸血，導遊或者旅社兩年內被記滿三十分會被停牌甚至釘牌，旅社必須同導遊簽訂明確薪酬合約，內地組團必須列明行程同收費。
比較新鮮兼辛辣嘅當然係引入記分制啦，據旅議會主席胡兆英所講，記分制按嚴重程度分四級懲處，最嚴重會一次過記滿三十分。第一次記滿三十分會停牌三個月，再犯停一年，三犯就要永久吊銷牌照。
局長收到報告似乎都幾滿意，劉吳惠蘭話喎，歡迎旅議會有關打擊零團費嘅報告，希望討論後盡快落實執行。劉局長仲話，專責小組做咗好多重點研究工作，旅遊事務署亦有全力參與，對於專責小組短時間內作出深入研究同建議，表示衷心感謝。
局長收貨啫，功夫茶又點睇呢？唉，贈你八個字：上有政策，下有對策。
呢嗱嗱嗱，中國人冇嘢叻，最叻就係陽奉陰違，否則神州大地唔會有咁多貪官污吏啦。表面上嚟睇，十項建議無疑都相當有見地，例如導遊有明確薪酬，咁咪唔使鋌而走險劏客賺佣金囉。之但係又咁喎，人心不足蛇吞象，難保導遊唔會貪得無厭連薪帶佣汁都撈埋，到時候依然又係強迫購物。
至於規定內地組團必須列明行程同收費，目的當然係要趕絕零團費甚至負團費。不過你知啦，內地同胞山寨文化所向披靡，弄虛作假嘅手法好高明㗎，枱面一盤帳，枱底一盤帳，呃到你四腳朝天都唔知乜嘢事。
即係咁，趕絕阿珍必須依足規矩辦事，功夫茶唔反對你去落實執行十項建議，淨係有一個溫馨提示，單靠規矩係冇用嘅，如果庸碌無能嘅官僚懶得監管咯喎，旅遊業照樣會畀一小撮敗類害死。
打個譬喻吖，係人都知殺人放火唔啱規矩，仲違反法例添，萬一殺咗人放咗火居然冇差人拉，咁條法例有乜嘢意義呢？家陣旅議會提出十項建議，情況就類似立法，空有立法而無執法，試問千千萬萬個潛在阿珍又點會收斂？
總而言之，劉吳惠蘭唔好下巴輕輕淨係識得話歡迎報告，成個旅遊業等住你去監管㗎，旅遊事務署唔好一如既往懶得就懶。如果話劏客導遊係敗類，唔曉得出手阻止嘅官僚就係敗家！