空有妙計燒垃圾 蠻官偏要推笨策

呢嗱，最近愈搞愈糊塗嘅堆填區風波正正係野蠻代表作。環境局局長邱騰華以將軍澳堆填區即將飽和為由，企圖侵佔鄰近嘅清水灣郊野公園五公頃土地，作為堆填區擴建之用。呢個咁荒唐嘅計劃，莫講話攸關切身利益嘅將軍澳居民強烈反對，保育團體一樣嘈到拆天，冇可能畀你伸出魔爪破壞自然生態環境嘅。立法會議員身為民意代表當然耍手擰頭，泛民同建制陣營六大黨派聯手提出議案，要求廢除相關指令，安排下星期三施政報告發表當日投票否決。

點不知，邱騰華借助律政司搬出一大套所謂法律觀點，一於大石砸死蟹。律政司話喎，立法會議員無權否決，連堂堂特首都無權叫停。雖然《二○一○年郊野公園（指定）（綜合）（修訂）令》忽然押後至二○一二年生效，不過問題未解決。

喂，你不但繞過議員監察，更加變相架空特首，係咪野蠻得過分吖？議員話要廢除指令，你就走去廢除議員，簡直超出正常人類忍耐範圍。難怪立法會小組委員會尋日一致通過迎戰到底，大不了同政府對簿公堂打官司囉。一旦訴諸司法覆核，咁就大大鑊。萬一政府敗訴，當然醜死怪威信掃地啦；即使政府勝訴，咁即係官老爺擺明車馬扼殺三權分立啫，隨時鬧出憲制危機！

唉，計功夫茶話齋，處理垃圾唔一定要用又笨又臭嘅堆填方法，高高在上嘅官老爺只要放下身段聽一聽民間意見，話唔定好過自己閉門造車。呢嗱，就好似青洲英坭咁吖，老早就提出寶貴意見，如果政府唔係採取漠視態度，未必會淪落到咁嘅田地。

青洲英坭執行董事莊善敦發表公開信表示，因應當局擬建綜合廢物管理設施以焚化爐燒垃圾，該公司早於四年前已經提出更節省成本嘅新方法。新方法名為環保廢物熔化系統，即係將水泥生產過程與燒垃圾結合，用都市固體廢物取代製水泥嘅燃料煤，產生能量製造水泥，過程之中產生嘅剩餘灰燼可以循環再用，作為水泥嘅生產原料。

嗱嗱嗱，聽落係咪好聰明？莊善敦仲話，新方法嘅排放量比傳統焚化爐較低，基礎成本係二十億元，每年處理費約二億元，較當局提議嘅綜合廢物管理設施分別便宜一半以及四分一。至於廢物處理量方面，預計新方法每日處理四千八百公噸垃圾，較當局建議嘅多出六成。美中不足嘅係，由於新方法必須興建於踏石角，咁先至可以同青洲英坭現有水泥廠產生協同效應。大概就係因為選址問題啩，青洲英坭一直不獲接納為設施嘅競投者。

即係咁，垃圾可以攞去燒，而且燒得比較聰明，奈何特區政府硬係懶理民間智慧。空有妙計燒垃圾，蠻官偏要推笨策，功夫茶買定花生等睇你幾時撞大板！