人人都知隨街亂丟垃圾係好令人討厭嘅行為，如果你喺風光明媚嘅郊野公園亂丟垃圾，更加係罪大惡極，事關咁係會破壞自然生態嘅。點不知香港呢個特區政府唔知黐咗邊條筋，居然計劃喺郊野公園亂丟垃圾，而且一丟就係數以噸計，你話係咪喪心病狂吖？
件事係咁嘅，將軍澳堆填區即將飽和，具體時間係兩年之後，為咗搵地方繼續處理大量垃圾，英明神武嘅環保高官叮一聲諗出絕世好橋，一於佔用清水灣郊野公園五公頃土地，納入將軍澳堆填區範圍，問題咪迎刃而解囉。
唔使多講，咁嘅絕世好橋非常之惹人反感。打個譬喻吖，郊野公園就好比你嘅客廳，堆填區一如洗手間，你會唔會容許任何人士喺你客廳範圍當眾開大開細吖？所以咯喎，將軍澳居民不斷反對，一次又一次走去請願。尋日再有人去到立法會門外示威，有人甚至瞓街，由假扮成特首曾蔭權同環境局局長邱騰華嘅示威者以垃圾覆蓋，不惜犧牲小我表達強烈不滿。
環保高官終於自取其辱嘞，審議呢個「鵲巢鳩佔」計劃嘅立法會小組委員會，六個主要政黨嘅八名議員一致投票否決，議員要求特首廢除指令。
冇錯，處理垃圾係需要空間嘅，擴建堆填區確有必要，問題係，使唔使佔用郊野公園呀？可唔可以揀幾個遠離民居嘅地點呀？將軍澳居民家陣已經夠慘㗎啦，經常傳來中人欲嘔嘅臭味，你仲要搞到人哋臭上加臭，好冇陰功啫！
講到呢度，功夫茶諗起一單國際新聞。意大利那不勒斯市政府計劃喺東部嘅泰爾齊格諾興建堆填區，當地居民抗議，變成警民衝突，兩架垃圾車被縱火焚燒。呢嗱嗱嗱，堆填區一旦選址錯誤，後果係可以好嚴重㗎。
話時話，處理垃圾獨沽一味只有堆填一個辦法？梗係唔係啦，其實仲可以利用焚化技術，不過要係非常先進嗰隻，否則容易造成污染。事實上，邱騰華舊年先至去過日本取經，參觀過位於東京嘅新江東清掃工場。新江東清掃工場係東京最大嘅都市廢物焚化設施，每日處理一千八百公噸廢物，焚化過程產生嘅熱能可以發電，供應鄰近嘅公共設施，包括游泳池、植物公園以及酒店等等。據講，新江東清掃工場採用先進技術防止污染空氣。
即係咁，功夫茶打死都唔信香港嘅環保標準高得過日本，既然日本都容許先進嘅焚化設施處理廢物，點解香港唔好好借鏡？點解係都要侵佔郊野公園搞堆填？
計功夫茶話齋，焚化設施取代堆填區絕對利多於弊，只要符合兩大原則，未必會有強烈反對。兩大原則就係，一，設施真係要非常先進，切忌造成污染；二，選址必須遠離民居，否則又係捉蟲。
興建焚化設施仲有一個好處，你知啦，香港特別多垃圾官僚，連侵佔郊野公園咁荒謬嘅辦法都諗得出，一於捉晒去焚化啦，該煨！