功夫茶細細個讀書嘅時候，記得教書先生經常愁眉深鎖吐苦水，佢哋話呀，日日對住四、五十個左擰右擰冇時停嘅頑皮學生，顧此失彼，頭痛欲裂！
亦即係話，單人匹馬照顧半百學生係一件非常艱巨嘅教學任務，教嘅又教唔好，學嘅又學唔到。照咁講，學生人數少咗係咪好事？正常而言當然係好事啦，不過呢家嘢正正係功夫茶諗來諗去都諗唔明嘅神秘謎團，點解教育局硬係打死都唔肯採用小班教學呢？因乜事幹淨係識得手起刀落狠狠縮班甚至殺校？
呢嗱，港男港女唔鍾意生兒育女吖嘛，膝下猶虛冇人繼後香燈由傳統要不得嘅詛咒逐漸變成受歡迎嘅祝福，出生率持續下降導致適齡學童買少見少，理論上最好嘅應對之道就係順水推舟變做小班教學，教書先生一來可以保住飯碗，二來教都教得輕鬆啲啦。至於學生哥咯喎，係就係少咗幾個反斗星君常伴左右玩泥沙，不過有助於用功讀書吖嘛，事關當你魂遊太虛發白日夢嘅時候教師唔會睇漏眼。
正所謂，人同此心，心同此理，所以多個教育團體要求教育局把握人口下降嘅機會，逐步推行小班教學。教聯、教協同教育評議會等等九個團體發表聯合聲明，內容係咁講嘅，明年中學先減到每班三十人，到二○一四年再減至每班二十五人。聯合聲明又希望教育局提出新措施，吸引學校自願每級削減一班，容許有能力提供寬廣高中課程嘅中學，即使每級只有兩班都可以繼續辦學，減少殺校嘅不良影響。
教育團體嘅要求算唔算過分呢？計功夫茶話齋，橫睇掂睇都唔算過分。喂，都話咗一個教師應付太多學生係顧此失彼㗎啦，每班減少學生人數既符合大勢所趨，亦可以提升教學質素，何樂而不為？
可惜吖，睇怕教育局真係不為，如果呢班無情官老爺願意從善如流推動小班教學，前排就唔會拋出一刀切縮班方案啦。按照呢個方案，理得你係咪極受歡迎人人爭崩頭報讀嘅傳統名校，總而言之所有中學各減一班。功夫茶想問一問港府教育當局，收生不足又話殺校，收生滿瀉又話縮班，呢種係乜嘢狗屁邏輯呀？
發表聯合聲明嘅九個教育團體短短兩個星期之內收集到六千個教師以及六千個家長簽名，支持逐步降低中學每班人數達致最終全面落實小班教學，反映呢個訴求係人心所向。萬一教育局逆民意而動，始終拒絕小班教學咁又點呢？教育界原來已經變得愈來愈團結，話唔定會決戰街頭抗爭到底！
事實上，香港教育專業人員協會計劃下周日發起「爭小班、反殺校大遊行」，預計最少十個團體加入，包括被視為左派嘅香港教育工作者聯會。換言之，家陣係無分左中右齊心爭取小班教學，以實際行動大聲喝止教育局繼續獨沽一味無情殺校。
唉，好心教育局唔好咁官僚啦，人心昭然若揭，民意不可違逆，假如夾硬殺校，功夫茶擔心怒氣沖沖嘅教師同家長掉轉頭殺你一個措手不及咋！