社會愈來愈複雜，細路愈來愈難教，學校責任愈來愈重。弊在政府口爽荷包立，成日掛住縮班、殺校，唔肯增加資源，搞到連學校社工亦嚴重不足，學生有事都唔知去邊度求助。
唔講唔知，原來社工人手不足問題唔止中學有，小學同樣嚴重。有社工組織踢爆，目前全港有近一百七十間小學平均只得半個社工或學生輔導員咁大把，換句話講，好多社工一個人要負責兩間學校，除咗輔導學生，仲要兼埋行政工作，分身乏術，服務質量點保障吖。
講嚟講去，又係政策無厘頭所致。呢，教育局○二年喺全港小學推行全方位學生輔導服務，個名就好聽嘞，但所謂全方位，原來係「全謊話」。有十八班或以上嘅「大校」，同十七班或以下嘅「細校」，用於聘請社工嘅撥款居然相差一倍，即係話，僅僅因為一個班嘅差別，Ａ小學可以請一個社工，Ｂ小學只夠錢請半個。咁白癡嘅政策，你話係咪九唔搭八吖？
最攞命嘅係，細校擔心收生不足畀人殺校，焗住要「來者不拒」，無論有學習障礙又好，啱啱嚟港嘅新移民學生也罷，統統收咗先至算。其實，背景唔同，成績參差，自然容易出現問題，需要輔導嘅學生自然更多，社工責任自然更重，花嘅時間亦自然更長。
最有需要嘅學校得到嘅資源反而最少，簡直匪夷所思！社工一個人兼顧兩間學校，惟有優先處理高危個案，其他個案只好放埋一邊先，咁有乜法子唔出事吖。有社工組織篤爆，當局話每間小學嘅個案數字大約係學生總數嘅百分之三，其實問題嚴重得多，部分小學個案數目係官方數字嘅兩倍。咁搞法，你話半個社工點頂！唔怪得社工組織要求增撥資源，落實一校一社工，講真，咁嘅要求絕對唔係過分。
更弊嘅係，資源長期不足，社工意興闌珊，紛紛劈炮，小學社工嘅流失率接近三成八，係一般社工流失數字嘅幾倍。有社工曾輔導過一個參與朋黨活動嘅小五學生，後來人手不足冇跟進，呢個同學卒之出事，帶埋Ｋ仔畀同學食。你話喇，政府係咪靠害吖？
早排有調查發現，全港有近四成三高小學生受情緒困擾，屬於嚴重情緒困擾嘅接近一成半，比內地城市、南韓等亞洲地區更嚴重。受訪學生入面，平均每一百個就有三個想自殺。更得人驚嘅係，有八成二受情緒困擾嘅學生，社工根本冇辦法識別。輔導難度愈來愈高，社工人數不加反減，真係令人莫名其妙。
學生係香港嘅未來，如果學生唔能夠健康成長，香港仲有乜嘢未來吖。計功夫茶話齋，連內地官員都識講「再窮不能窮教育」，港府坐擁巨額財政儲備，請多幾百個小學社工使得幾多錢？與其勞民傷財掟幾百億申辦亞運會，不如撥多啲資源保護幼苗仲實際啦！