開講有話，是藥三分毒，用藥須謹慎。藥物用得啱可以醫病救人，萬一食錯藥，唔止醫唔到病，甚至隨時可以攞命添。
尋日係「全球藥物安全日」，香港執業藥劑師協會展開教育活動，教育市民安全用藥，包括食藥前檢查到期日、問清楚副作用、更新醫療紀錄等等。
查實，安全用藥固然重要，但買到安全嘅藥更加緊要。市面藥物林林總總，唔小心買錯藥，或者遇着不良商戶賣假藥，後果可大可小。呢，消委會近年收到嘅藥物投訴急增，由○八年嘅三十二宗升到○九年嘅四十二宗，今年一到九月已經收到二十二宗，主要涉及藥物價格同銷售手法，包括有不良商戶偷龍轉鳳，顧客拆開包裝後至發現貨不對辦。消委會建議港府設立有效監管機制，處理業界嘅不良銷售手法。
講真吖，港府對藥物銷售監管不足，縱容不良商戶亂咁標價，已經唔係乜嘢新聞，好多市民甚至旅客都中過招，消委會收到嘅投訴只係冰山一角嘅咋。就講上個月，有位台灣旅客喺尖沙咀一間藥房買咗一支藥膏，事後發現售價等於附近藥房三倍，旅客返去藥房理論，竟然遭到職員粗暴對待。由於事件被台灣傳媒廣泛報道，香港形象嚴重受損。
錢銀事小，人命事大。買貴藥都只係錢銀損失，最離譜嘅係假藥氾濫，隨時害死人都有之。過去三年，海關至少發現八十九間藥房涉嫌賣假藥，淨係舊年已檢獲七萬幾件冒牌藥物，可惜大部分都係輕判罰款了事。為咗保障市民，消委會正與海關研究推出「點名」機制，公布賣假藥嘅商舖名稱，呢招無疑係有一定阻嚇作用，但只係亡羊補牢，如果當局平時唔監唔管，等到消費者中招先至公布名單，又有乜嘢用呢？其實，賣假藥害人害物，應該嚴懲至啱！
講開假藥，內地就係舉世聞名嘅造假王國，以次充好、以假亂真嘅醜聞幾乎無日無之，有人用老鼠皮扮鹿茸、有人將蘿蔔當野參、有人將藍墨水溝麵粉當偉哥，有內地傳媒統計，全國賣假藥網站超過一萬個，每年唔知幾多人食完假藥枉死。
正因為內地假貨氾濫成災，唔少同胞鍾意嚟香港購物。不過，唔好話功夫茶唔提醒，好事不出門，壞事傳千里，如果當局唔加強打擊不良商戶，香港正貨之都、購物天堂嘅招牌遲早不保，到時咯喎，睇吓內地同胞仲會唔會嚟香港購物。
計功夫茶話齋，為政好似行醫，最緊要識得對症下藥。香港近年發生咁多劏客醜聞，最根本嘅原因就係監管不嚴，當局淨係識得事後補鑊，又點可能解決問題吖！