講真，香港確係驚心動魄抹得一額汗，事關超強颱風「鮎魚」過門而不入，否則咯喎，隨時又係死人冧樓。台灣同福建就冇咁好彩嘞，特別係受到風雨蹂躪嘅寶島台灣，蘇花公路出現車毀人亡嘅嚴重事故，而且牽涉大陸遊客，死無全屍慘不忍睹，嗰種鬼哭神號你都咪話唔心酸。
的而且確真係好好彩，你知啦，香港雖然話就話係一個國際大都會啫，不過有時候抵禦自然災害嘅能力認真不敢恭維。就好似今年七月一場黑色暴雨咁吖，居然令到大埔沙埔仔村一名村民無辜辜被洪水捲走，最終屍浮碧海。假如係落後不堪嘅第三世界，你可能會覺得洪水捲走村民係不可抗拒嘅天災，之但係作為一座號稱先進過不少歐美國家嘅現代化城市，竟然會有村民死於黑雨，你就會覺得匪夷所思。
仲有一件事值得注意，事發地點大埔沙埔仔村其實係一個好有價值嘅歷史遺址，當地有一個古代碗窰，由明代中葉開始一直投產至一九三二年，遺址早於一九八三年已經被列為法定古蹟。既然係法定古蹟，係咪應該受到適當保護呀？對唔住，人有人捲走，碗有碗沖爛，大量珍貴文物付諸流水。
好嘞，一場黑雨搞到咁大劑，當然要徹頭徹尾查清查楚啦。唔好忘記喎，村民懷疑罪魁禍首係渠務署工程導致河床收窄，造成洪水一發不可收拾，事關重大更加要深入調查。
萬眾期待之下，由發展局局長林鄭月娥委任水利專家進行嘅獨立審核報告終於完成，報告內容係乜東東呢？嗯……唔好意思，功夫茶真係一頭霧水，因為政府官僚玩隱蔽，死都唔肯講責任誰屬。發展局常任秘書長韋志成係咁講嘅，由於死因庭好大機會召開死因研訊，為免影響警方刑事調查，所以現階段不會公開報告嘅具體內容，只可以提供一份事實資料摘要。
大家可能會話，有事實資料摘要都好過冇吖。等功夫茶話過畀大家知，所謂事實資料摘要對於平民百姓嚟講係冇意義㗎，畀你知道當時嘅水浸時間、水位高度、洪水流速以及其他瑣瑣碎碎嘅資料咁又點呢？只不過一大堆冷冰冰數字，根本冇辦法令你睇到全幅圖畫，冇辦法了解到底發生乜嘢事。
最關鍵嘅問題係，渠務署工程究竟係咪導致河床收窄嘅罪魁禍首？死者家屬係咪應該向相關人等討回公道？哈，官老爺梗係冇咁順攤畀你捉住佢痛腳啦，所以即使報告完成都唔肯話過你知，一於利用死因庭作為擋箭牌，擋得一時得一時。
有報告等於冇報告，難怪沙埔仔村委員會副主席黃晚明批評，完全冇交代到責任誰屬，冇為村民同死者家屬提供滿意交代，好涼薄！
係呀，好涼薄呀，呢啲咪就係典型嘅官僚作風囉。計功夫茶話齋，既然黑雨報告玩隱蔽，無辜亡靈一定難眼閉，不如咁啦，人唔報告，鬼去報夢，等佢發噩夢嚇一餐飽之後，鬼拍後尾枕一五一十交代清楚！