醉酒駕駛有幾危險，大概唔使功夫茶再多花唇舌喇啩，淨係舉一個例子已經足夠有餘。舊年年初，以農曆計就係前年年廿八洗邋遢，落馬洲有一名司機豪飲九樽啤酒之後駕駛貨車撞到一架的士，車內六人全部死亡。就係咁樣，六個家庭徹底粉碎，原本應該喜氣洋洋嘅農曆新年變得愁雲慘霧。
除咗醉酒駕駛驚心動魄之外，藥後駕駛其實一樣咁恐怖。你知啦，索咗Ｋ嘅迷幻司機好似鬼上身咁o架，舞龍咁舞有之，橫衝直撞有之，間唔中仲夠膽死高速撞向警察路障。所以話啫，實在有必要雷厲風行打擊醉駕同藥駕，當做拆除兩個「馬路炸彈」吖嘛。
不過問題係，點打擊好呢？係咪響應不少人儆惡懲奸嘅呼聲，將醉駕同藥駕導致他人死亡嘅罪行列作最高級別嘅謀殺？聽講，立法會交通事務委員會向政府提出一連串建議，不如先睇睇尊貴議員有啲乜嘢尊貴意見吖。
建議一：打擊毒品源頭。建議二：警方加設路障。建議三：進行現場測檢。建議四：由於部分成藥含有鎮定劑成分，服用之後會有睡意，所以要求衞生署對相關成藥張貼警告字眼，呼籲服後切勿駕駛。建議五：司機醉駕，乘客有責。
咦咦咦，咪住先，功夫茶係咪寫錯咗第五個建議？睇真啲，冇錯喎，尊貴議員確係咁樣講。立法會交通事務委員會仲話，英國曾經有案例，乘客因為喺知情嘅情況下冇出手制止司機醉駕，最終被控教唆，要協助司機向受害者賠償。換言之，司機犯法，乘客同罪。所以咯喎，議員就拋磚引玉嘞，希望廣泛諮詢民意，睇下係咪規定乘客有責任舉報或者勸喻司機唔好醉駕或者藥駕，否則自己都會惹上官非。
既然係準備諮詢民意，咁就等功夫茶第一個表達民意啦。三個字：不合理！
喂，假如個司機你係識得嘅，你就話有機會出聲啫，不過即使出聲，對方未必睬你。如果你搭嘅係的士、小巴、巴士諸如此類，司機九成九係陌生人，點出聲呀？更何況，醉駕或者藥駕好多時候表面上係睇唔出嘅，咁又點出聲呢？議員可能會話，大前提係「知情嘅情況」，不知者當然不罪啦。好嘞，假設有一架滿載小巴，司機醉駕撞車，事前冇人勸阻，試問你點樣分得出十六個乘客之中邊一個知情，邊一個唔知情？即使知都扮唔知啦，唔通你將十六個乘客捉去逐個逐個測謊？唔好玩啦！
呢嗱，講開小巴，家陣咪有車速顯示器嘅，理論上係等乘客一旦發覺司機超速，即刻為己為人當頭棒喝吖嘛。功夫茶問問你，你幾時見過車速顯示器響到嗶嗶聲嘈喧巴閉嘅時候，會有乘客要求司機減速？唔通撞車嘅時候你又將乘客當作同謀罪犯一樣要拉要鎖咯喎？
計功夫茶話齋，其他建議都啱數嘅，醉駕同藥駕唔止要打擊，更加要重罰，不過一講到司機犯法乘客同罪，咁就真係不敢苟同咯。除非咁樣，尊貴議員答應一件事，假如有官員失職落台，負責監察嘅議員一齊引咎辭職，咁就可以再考慮。