施政報告冇料到，但問責局長循例都要上立法會解吓畫，吹吓水。尋日輪到環境局局長邱騰華出場，佢啱啱喺擴建堆填區上面衰咗一鑊，依然吹水唔抹嘴，講完低碳講新能源，將自己扮到好似環保大使咁，唔知畀佢嚇死，知就畀佢笑死。
高官靠得住，豬乸會上樹。邱騰華一向好大喜功，脫離實際，搞嗰樣衰嗰樣。呢，一波未平一波又起，擴建堆填區指令啱啱被廢，立法會審議緊嘅《建築物能源效益條例草案》又引起爭拗喇，原來當局制訂草案閉門造車不特止，仲漠視專家提出嘅風險，法例未見其利先見其害，隨時害到市民雞毛鴨血。
話說草案規定所有新落成建築物嘅公用地方，包括中央冷氣、升降機及主供電系統必須符合基本能源效益標準，舊樓業主進行同類裝修工程，亦要根據草案提升能源效益，違例者要負上民事甚至刑事責任。
提高能源效益本來係好事，弊在當局諗嘢唔經大腦，留低好多手尾，隨時成為業主陷阱。譬如咁，如果業主唔清楚草案要求，裝修工程唔合規格，賣樓簽咗臨時買賣合約之後，咁啱樓價大跌，準買家可以物業唔符合能源效益規定為理由取消交易，到時唔單止賣家無辜蒙受損失，連負責交易嘅律師都可能要孭鑊。
律師會已經多次向當局發出警告，話草案可能成為物業準買家「踢契」嘅藉口，影響物業交易及小業主利益。點知環境局竟然執迷不悟，罔顧草案嘅漏洞，仲強調買賣雙方有責任了解物業嘅能源效益情況，拒絕認錯補鑊。
一項關乎無數市民利益嘅法例草案存在咁大漏洞，港府居然無動於衷，有立法會議員批評當局「冥頑不靈」，真係一啲都冇鬧錯。有議員警告話，建築物能源效益草案隨時會淪為「堆填區翻版」，爛尾收場，環境局又衰多一鑊，睇怕只係時間問題。
話時話，邱騰華上任三年幾，花招一樣接一樣，似做騷多過搞環保，但從未見佢做過一齣好戲，鬧劇就不斷上演。呢嗱，慳電膽現金券計劃搞出個大頭佛，差啲令港府陷入管治危機；推動停車熄匙又觸犯眾怒，愈諮詢愈縮水，變咗自廢武功。呢次堆填區風波仲大鑊，環保減排交白卷，佢諗住借擴建堆填區攞番次彩，點知揀郊野公園落手，加上推行政策手法老土兼霸道，卒之畀立法會明剃眼眉，惡法被廢，好戲做唔成，反惹嚟一身蟻。
講真，保護環境係大趨勢，節能減排連小學生都知係乜，奇怪嘅係，政策再好，落到邱騰華呢班官員手上就搞到一鑊泡。無他嘅，好大喜功、漠視民意、自以為是、點極都唔醒，梗係撞板多過食飯啦！計功夫茶話齋，一個問責局長政治智慧連小學生都不如，推動政策鋪鋪爛尾，一味添煩添亂，簡直係港府嘅負資產！