唔知大家有冇留意，植物其實同動物一樣，都有「外來物種」與「原生物種」嘅分別。香港人最有親切感嘅洋紫荊，當然係原生物種啦，否則都唔會成為代表香港嘅象徵。至於外來物種又係乜呢？大家不妨出街睇一睇，基本上你見得到嘅樹木都係外來物種。
香港點解有咁多外來物種？種植呢啲樹木有乜嘢後果？先解答第二個問題，既然係從外而來，梗係有機會「水土不服」㗎啦；掉番轉頭嚟講，假如外來物種生命力特強，不但落地生根，而且宗族繁衍，咁又有機會侵害原生物種既有地盤。舉一個經典例子吖，台灣墾丁好多人都去過啦，海角七號浪漫到暈，不過當地有一種樹木生長到滿坑滿谷，簡直氾濫成災，危害原生物種，學者專家稱之為「生態殺手」，呢隻外來物種叫做銀合歡。
講咗咁耐，功夫茶到底想講乜呢？冇嘅，實在係想話畀大家聽，香港種植樹木好多時候亂咁嚟，種乜又唔知，種完又唔理，卒之遍地種下數之不盡嘅禍根。係呀，名副其實係禍根早種，事關樹木處理不善係會冧嘅，一冧就隨時砸死人，有時砸死女學生，有時砸死單車男。
中文大學趁暑假期間抽驗全港超過五十棵異葉南洋杉同樟樹，發覺四成有白蟻侵蝕、穿洞同真菌等等問題，超過一成更加有潛在倒塌危險，奄奄一息嘅病樹有必要移除。點解要專門驗呢兩種樹？因為異葉南洋杉係外來物種，樟樹係原生物種，咁就方便研究兩者嘅分別。
負責調查嘅中大生命科學院表示，政府缺乏一套完善嘅樹木管理系統，每每當樹木即將倒塌先至發現問題，而本港亦冇培訓相關專才，唔了解不同樹木嘅倒塌原因。中大就建議嘞，政府建立樹木健康數據庫、使用更周詳嘅檢測法以及抽樣檢測樹木強度同腐爛情況。中大又要求，政府種植樹木必須根據環境選擇適合品種。
大家知唔知異葉南洋杉係乜嘢樹？唔知唔緊要，功夫茶話過你知。異葉南洋杉原產於南太平洋羅福島，單一主幹扶搖直上，可以生長到二百幾呎，即係二十幾層樓咁高，喺香港閒閒地都有百幾呎，相信係現存香港最高大嘅樹種。好嘞，假設有一棵百幾呎高嘅異葉南洋杉由於管理不善嘭一聲仆落街，後果會係點呢？唔係嚇你，萬一唔好彩身處其中，即使頭戴鋼盔身穿鐵甲，睇怕你都會被砸到七孔流血！
唉，講來講去又係官僚主義為禍人間，政府係就係事後補鑊成立咗一個樹木管理辦事處，可惜吖，徒有姿勢，毫無實際。人哋驗樹用儀器，佢哋驗樹用目測，兒戲到單憑肉眼睩一睩，驗到棵樹有冇病至奇啦！
中大生命科學院教授趙紹惠就質疑嘞，樹木辦人員未必有專業資格，應該引入更多認可資歷。
所以話啫，樹係唔可以亂種嘅，種完又唔可以唔理，否則每一棵樹都有機會變身殺人兇器。計功夫茶話齋，樹木辦為人為己，點都要做好管理工作，事關病樹隨時砸死你，砸死幾個官老爺就唔好啦！