都話咗勉強冇幸福，霸王硬上弓呢家嘢唔係正常人類可以接受嘅，見你目露兇光笑口淫淫亦步亦趨，梗係好似小妹妹咁樣大聲嗌唔好㗎啦，除非係變態被虐狂嘅啫。
呢嗱嗱嗱，大家唔好以為功夫茶講緊鹹濕古仔，雖然我見猶憐嘅風化案無日無之，有時候連禽獸不如嘅阿媽都會親手將自己個寶貝女送羊入虎口，大被同眠玩３Ｐ，不過功夫茶講緊嘅係特區政府一意孤行企圖夾硬侵佔清水灣郊野公園，亦即係香港人集體擁有嘅處女地。唔理三七二十一強行硬闖嘅後果係撞正大板，呢鋪都算瘀皮咯。
尋日喎，立法會議員終於做番一齣好戲，大比數投票通過廢除擴建將軍澳堆填區嘅指令，阻止無良官僚利用郊野公園五公頃土地倒垃圾。投票結果有幾大比數？巴閉咯，討論超過五小時之後，地區直選議員有二十八人贊成廢令，只有身兼行政會議成員嘅劉江華獨家村一支公反對。至於通常唔介意唯唯諾諾做保皇派嘅功能組別，今次都發揮真我個性冇面畀，多達二十七人支持廢令，反對票及棄權票僅僅各一。由於廢除指令獲得通過，政府提出押後擴建堆填區至二○一二年嘅動議已經毋須討論。
唉，特區政府嘅官僚確係好鬼死無良㗎，堆填區本身已經係臭氣熏天嘅厭惡性工程，你擴建還擴建，搞乜鬼要打郊野公園嘅鬼主意先？如果郊野公園應該用嚟倒垃圾，禮賓府係咪可以開放做狗廁所呀？莫講話將軍澳居民誓死反對，保育團體一樣仗義執言，喺咁嘅環境之下，身為民意代表嘅立法會議員理所當然一反到底。
哈，死得佢吖，眼見議員無分左中右罕見地一致反對，十足十聯手抗暴捍衞郊野公園貞操，環境局局長邱騰華居然搬出律政司，口口聲聲話議員無權否決，即使係特首亦都冇否決權，極其量只有酌情權押後實施日期。
你知啦，人要面，樹要皮，做得尊貴議員冇可能任得你搓圓撳扁，你話冇權否決就乖乖就範，乜架都丟清啦，簡直尊嚴掃地。所以咯喎，壓力愈大反抗愈大，議員個個變身反對派，你話冇權否決咩，老子偏偏要廢你武功！
就係咁樣，立法會出現咗呢一齣大比數廢除指令嘅好戲。
戲就睇完嘞，係咪就咁散場？唔係㗎，呢一齣係連續劇，劇情視乎長官意志而發展。即係咁，萬一政府唔忿氣，將成件事帶上法庭，行政與立法機關對簿公堂，咁就過足戲癮咯，高潮迭起，劇力萬鈞。
你知啦，香港奉行三權分立，行政、立法與司法互相制衡，如果出現行政機關欺壓立法機關，又或者掉轉頭立法機關打贏官司，行政機關樣衰衰一敗塗地，即係三權分立失去平衡，隨時出現憲制危機㗎。
計功夫茶話齋，反正家陣企圖侵佔郊野公園嘅指令已經淪為垃圾，活該攞去堆填，邱騰華急流勇退好過啦，唔好死心不息繼續伸出魔爪咯，小心整部政府機器施政失靈自動報廢，又要丟落堆填區呀！