仲記得香港東亞運「創造傳奇一刻」嘅口號嗎？港府勞民傷財搞咁大陣仗，原來真係為咗嗰短暫「一刻」㗎。至於使咁多錢，納稅人有冇得着，咁就話之你咯。
香港有唔少ＢＭＸ小輪車發燒友，但啱心水嘅達標訓練場地就鳳毛麟角。咦，葵涌醉酒灣咪有個唯一符合國際標準、賽道三百五十米、有七百八十個觀眾座位嘅香港賽馬會國際小輪車場嘅？啱晒佢哋啦！
冇錯，係就係有呢個ＢＭＸ場，舊年東亞運仲做過比賽場地添。當初起嗰陣，港府話要用呢個場推動本地小輪車運動長遠發展。弊在「傳奇一刻」之後，當局根本冇兌現承諾，將個場租咗畀香港單車聯會營運，啟用後一直冇向公眾開放。市民唔知情，去親都摸門釘。
咪住！大拿拿使二千二百幾萬起嘅靚場，居然變相成為某啲團體話晒事嘅「私人俱樂部」，市民次次望門興嘆，畀人剝奪咗享受單車樂趣嘅權利，好過分啫！納稅人科水興建體育設施，當局竟然「請」番佢哋食閉門羹，打完齋唔要和尚不特止，直頭連隻齋缽都霸埋，有冇離譜啲吖？
有葵青區區議員直斥港府冇將場地開放畀公眾，係冇做到以民為本，亦失去咗推動本地小輪車運動嘅意義。不過，民政事務局似乎並唔當一回事，只係話會跟進事件。
查實，當局所謂「推廣體育運動」，不過係想借機會幫自己塊面貼金啫，有邊次真係以民為本㗎？呢嗱，舊年東亞運由籌辦到比賽，勞師動眾搞咗一大輪，結果亂象叢生，售票混亂、場館爛尾、賽道凹凸不平等等醜聞未停過。盛事曲終人散，新建設施變「私有」，原來根本唔係用嚟推廣體育，你話港府係咪以民為笨吖。
吓！港府好似衰開有鋪癮咁，東亞運蝦碌不斷，賠了夫人又折兵都唔收手，家陣仲膽粗粗話要申辦二○二三年亞運會添，真係不自量力，不知所謂。
民政事務局局長曾德成尋日死撐話，預咗市民會有強烈反對聲音，又話坊間指申辦亞運成本要四百幾億元嘅計算唔準確，當中三百億用於建場館，無論香港攞唔攞到主辦權，設施都會按計劃興建，呢筆建築費用唔應該列入申辦開支。
講真，無論當乜開支，入乜數都好，三百億絕對唔係一筆細數。呢次港府提出申辦亞運，市民最反感嘅其中一點就係，當局多年嚟唔重視體育發展，因為資源所限，運動員訓練不足，比賽成績慘不忍睹，申辦亞運完全係好大喜功，不切實際。
曾德成口口聲聲話，現階段討論應該聚焦喺香港體育點至發展得更好。計功夫茶話齋，如果為亞運會掟幾百億起新設施，到頭來市民又係不得其門而入，體育點發展呀？咁嘅「傳奇一刻」，有冇都罷咯！