祈福黨出沒注意！呢次唔止師奶阿婆，幾百萬港人都隨時可能中招，因小失大，後悔莫及。落足嘴頭氹人落疊嘅亦唔係普通騙徒，而係一向縮骨卸膊、以民為笨嘅港府。
呢嗱，劣評如潮嘅醫療融資方案又出場嘞。行政會議禮拜二審議自願性醫療保險計劃，下月初正式諮詢公眾。根據當局推算，市民日後要交嘅保費，由每日四至十五蚊不等，愈年輕投保保費愈低。
咪以為有「全包宴」歎，港府只提供「基本套餐」咋，計劃主要包括入住私家醫院三等房同做基本手術等保障，唔包門診服務。想有更優質服務？對唔住，要自己向保險公司買附加保險。
仲有「魔鬼細節」要打醒十二分精神實㗎，原來十幾蚊保費未計保險公司嘅佣金。據估計，呢條數「最低消費」係保費嘅三成，最高可能去到保費一半。嘩，辛辛苦苦供份醫保，畀人掠咗一大橛，變咗幫保險公司打工，搵笨咩！
當局話就話考慮規管佣金水平，將比例降到佔保費一成幾，不過仲要同保險業界商討喎。講真，呢個政府出咗名議而不決，傾得嚟蚊都瞓，蛇都死咯。
保險公司攞幾多未知，港府提供嘅「着數」有幾多，同樣係未知數。嗱，當局話已經預留五百億儲備作醫療融資，為投保市民提供優惠，包括計劃推出頭半年內投保，保費七折優惠，剩低嗰三成由政府承擔，直至投保人出現索償為止；又話打算為年滿六十五歲嘅投保人「陪供」，直至投保人過身，不過實際補貼幾多未定。
同市民健康息息相關嘅重要政策，呢樣未知，嗰樣又未定，咁就掟出嚟「諮詢」，叫人哋點決定先？如果到時收費高到離譜，對低下階層嚟講，莫講當局孭三成，就算孭一半都夠攞命啦。港府出豉油要市民出雞，藉機推卸對公營醫療嘅承擔，同擺天仙局有乜分別？
當局放棄強制性供款，改為自願參與，並考慮提供稅務優惠，本來諗住吸引中產投保。弊在中產人士絕大多數已買咗醫療保險，計劃本來對佢哋已經冇乜吸引力，家陣港府連現有醫療保險日後點過渡到自願醫保計劃都未有定案，中產點畀意見呀？
再講，新方案保費水平估計遠遠超出低下階層市民嘅負擔能力，弱勢社群完全冇辦法受惠，點會「自願參與」吖？對中產人士嚟講，方案唔可能提供更高質素嘅服務，甚至連已自購嘅醫療保險都不如，又何必多此一舉？
港府為咗將醫療負擔轉移到市民身上，強推醫療融資方案，但進退失據，朝令夕改，方案愈來愈冇人吼。計功夫茶話齋，醫療融資方案高不成低不就，低下階層冇錢買，中產人士唔捧場，咁仲搞假諮詢嚟做乜？