喺香港做生意話難唔難、話易唔易，關鍵問題係視乎你有冇把炮喺政府手上攞到「專營權」。所謂專營權，通俗啲講句即係「奉旨賺到盡特權」，永冇蝕本，只有賺錢，而且係大賺特賺嗰隻。
呢嗱嗱嗱，東區海底隧道再次密謀瘋狂加價，一加就係加四成，名副其實食人隻車，點解咁夠膽獅子開大口呢？原因咪係專營權三個字作怪囉，東隧公司白紙黑字得到政府保證，利潤回報率高達百分之十五，所以理得你天王老祖一於有恃無恐。東隧話喎，專營權將於二○一六年屆滿，因為遲遲未達到合理回報，時間經已無多，所以有必要加價四成，否則無法向股東交代。
東隧一次又一次申請大幅加價梗係犯眾憎啦，尤其係司機個個眼火爆。所以咯喎，負責審批嘅行政會議成員為免引火自焚，事先張揚話會投反對票，除非東隧願意降低加價幅度。
行會擺晒姿勢詐假意「為民請命」，企圖阻止東隧瘋狂加價，有冇用呢？計功夫茶話齋，嘥鬼氣啦，阻得初一阻唔到十五，事關專營權呢家嘢的而且確奉旨賺到盡，即使行會阻頭阻勢，東隧一樣可以要求仲裁，而仲裁結果往往為加價開綠燈。
東隧為咗加價而要求仲裁過往先後有兩次先例，第一次係九七年，第二次係○二年，兩次都勝訴，第二次仲獲准加價七成添。假如有第三次，功夫茶雖然唔係世界盃八發八中神機妙算章魚保羅，不過一樣有勇氣拍心口預測，政府必敗，東隧必勝！
咁即係點？莫非小市民肉隨砧板上，任由東隧予取予攜？唉，怪只怪政府弱雞囉，如果係真真正正強政勵治，一二三出錢買起東隧啦！
嗱，大家唔好心邪呀，所謂買起別無他意，純粹就係回購咁解。買起東隧需要幾多錢呢？特區政府冇嘢巴閉，淨係錢多，申辦亞運一出手就話四百幾億，豪爽到成個財大氣粗暴發戶咁款。
咦咦咦，咪住先，申辦亞運好似注定失敗咯喎，一來民意一面倒反對，二來政黨冇邊個贊成，睇怕立法會冇可能批准撥款。咁咪好囉，唔好貪慕虛榮浪費公帑打造政績工程吖嘛，慳番四百幾億可以做好多務實工作㗎，譬如回購東隧啦，譬如紓解民困啦，再譬如復建居屋啦……總而言之但凡政府蹉跎歲月應做而未做嘅都可以做。
話政府弱雞確係一啲都冇錯，事關政府本來已經準備公布「紅加東減」嘅隧道分流方案，即係調高紅磡海底隧道收費，將多收嘅車費資助東隧減價。哈，就喺方案公布前冇幾耐，東隧率先發難提出加價申請，簡直完全當你冇到。
一於咁話啦，弱雞政府叻番一鋪咁多，買起東隧事不宜遲！