潮流興仇官仇富，關鍵原因係官商勾結為富不仁，政府坐擁逾二萬億儲備又孤寒成性扶貧不力。喺咁嘅情況之下，你估曾蔭權最新一份施政報告提出嘅關愛基金，有冇可能化解民怨吖嗱？
計功夫茶話齋，不如咁講啦，收咗稅又唔肯改善施政作風嘅官老爺就好似賊佬搶咗你銀包，忽然之間大發慈悲掟番十元八塊畀你搭巴士返屋企，你會唔會同呢個賊佬化敵為友吖？
所謂關愛基金嘅構思非常之咁簡單，目標善款一百億，政府出一半，商界出一半，就好似《歡樂滿東華》或者《星光熠熠耀保良》咁樣，曾蔭權擔任司儀負責抌心口，善長仁翁乖乖慷慨解囊，稍稍唔同嘅係捐款人冇機會上台獻唱首本名曲。善款一到手咯喎，咁就展開扶貧工作㗎喇，目標人物係現有福利政策嘅「漏網之魚」，譬如冇申領綜援嘅窮光蛋，又譬如上網都冇錢嘅學生哥。
構思一字咁淺，不過你千祈唔好追問具體嘅扶貧辦法到底係點樣，事關曾蔭權淨係將個波交咗畀政務司司長唐英年，細節係完全未有嘅。
好嘞，當你真係成立關愛基金，當你真係走去扶貧濟世，仇恨官老爺嘅情意結就會消失得無影無蹤哩咩？唔好玩啦，最多你派糖嘅時候係咁意講句多謝，轉個頭照樣問候你祖宗十八代。核心問題未解決吖嘛，福利政策冇可能搞到好似做一場慈善晚會咁樣，民怨冇可能化解。
唔好忘記喎，怨氣沖天嘅港人同胞之中，大部分都唔係瞓天橋底嘅窮光蛋，亦即係並非你嘅扶貧對象，你成立關愛基金對於佢哋嚟講係冇切身關係嘅。你話嘞，有乜可能同你化敵為友？
嗱嗱嗱，唔好怪功夫茶以小人之心度君子之腹呀，曾蔭權抌心口募捐話唔定會產生一個副作用，善長仁翁呢邊捐咗錢，嗰邊或者會縮皮，唔會再向其他慈善團體大力捐輸，咁就弊傢伙嘞。
再講吖，關愛基金睇怕只會有短暫嘅派糖措施，唔會有長遠嘅扶貧政策，試問窮等人家食得你一餐飯，可唔可以食過世呢？開講都有話啦，與其送人一條魚，不如教人去釣魚，如果冇長遠嘅扶貧政策，呢一項塗脂抹粉嘅形象工程冇可能持續發展，到頭來，一場歡喜一場空。
總而言之，功夫茶點一首披頭四嘅經典金曲畀曾蔭權聽一聽，請留意歌名：Money Can't Buy Me Love。你以為出錢百億就可以化怨恨為關愛？你以為整個基金就可以洗刷形象？唔好咁天真啦，花拳繡腿係冇用㗎！