噯唷？呆咗！原來香港警察唔係想像之中咁惡氣騰騰，只要係遊人，而唔係遊行，態度其實係可以和藹可親！
功夫茶到底講緊乜呀？大家稍安毋躁，坐定定聽個古仔先啦，呢個古仔有少少幻海奇情味道。
話說今年十月一日國有喜事放煙花，自必然萬人空巷㗎啦，交通管制係例必會發生嘅事，一來唔想車撞車，二來避免人踩人。於是乎，十．一煙花匯演期間尖沙咀封路，多名交通警員將鐵騎停於路中央執勤。
交警鐵騎對於好多人嚟講非常之咁威風凜凜，尤其係好奇心特別強盛嘅遊客。而遊客之所以係遊客，梗係最鍾意拍照留念證明到此一遊㗎啦，無人駕駛嘅交警鐵騎隨即成為一條獨特嘅人文風景線，一個二個左拍右拍。本來呢，純粹影幾張沙龍帶返鄉下向父老叔伯兄弟炫耀炫耀係無可厚非，問題係，內地同胞有時候言行舉止非比尋常，喺商場任由小朋友當眾開大開細都夠膽死，所以咯喎，有幾個勇不可當嘅遊客索性一屁股坐上交警鐵騎作狀影相，閃光燈係咁閃呀閃。難聽啲講句，執法工具淪為兒戲玩具。
嘩！咁都得？係呀，真係咁都得呀。更加得意嘅係，近在咫尺嘅交通警員竟然無動於衷，不但冇干涉阻止，甚至有人秉承旅遊之都嘅好客之道，全副武裝同女遊人企喺鐵騎旁邊合照。
嗱，功夫茶唔反對香港警察表現親民一面，大時大節與民同樂冇乜嘢唔啱，徇眾要求影張相啫，亦都唔係大錯特錯。功夫茶比較關心嘅係，執法工具只可遠觀不可褻玩，你睇下咪算囉，極其量影張相，搞乜鬼坐上去扮晒叉燒呢？假如有人存心不良，偷走部分儀器或者惡意破壞，後果確係可大可小㗎！
至於忽然之間和藹可親嘅警務人員，功夫茶想問一問，警隊冇守則規定執法工具唔可以隨便畀人毛手毛腳嘅咩？如果平民百姓坐上鐵騎嬉嬉鬧鬧都冇人阻止，咁警槍係咪又可以亂咁借畀人去做拍攝道具呀？假如有人想話玩制服誘惑，警察叔叔係咪又會寬衣解帶滿足遊客需要呀？咦，好多人鍾意玩ＳＭ喎，借埋手銬吖，唔該！
唉，呢啲咪就係進退失據囉。冇錯，警察經常畀人一種兇神惡煞嘅不良印象，尤其係對付和平示威者，動不動要拉要鎖，胡椒噴霧兜口兜臉顏射一通。之但係咁，你想洗底從良都唔使咁極端啩，交警鐵騎任得遊客好似去到遊樂場玩旋轉木馬咁，親民無疑係夠晒親民，只可惜兒戲得過分啫，成何體統呀！
嗱嗱嗱，你唔好死撐狡辯，話呢啲係促進警民關係嘅公關手段呀，如果你咁講，功夫茶真係會問警隊一哥借架衝鋒車去遊車河㗎，甚至會借艘水警輪去離島食海鮮！
總而言之，警民同樂可遠觀，執法工具忌褻玩，差人做嘢，唔好玩啦！