開講都有話，人靠衣裝，佛靠金裝，先敬羅衣後敬人，所以香港人出晒名鍾意買衫買褲買鞋買襪，尤其係愛靚才會贏嘅港女，添衣置裝簡直年中無休，購物狂潮一浪接一浪。吖，話時話，以港男港女咁熱衷於滿身名牌嘅作風嚟講，將香港打造成時裝中心呢個咁有創意嘅宏願，如果唔係落喺辦事不力嘅庸碌官僚手上，其實係有機會夢想成真o架。
衣裝呢家嘢，對於好多行業都算得上係賣點。好多女士迷上制服，所以投身空姐；好多男士迷上制服，所以報考警察，呢啲大概就係制服誘惑。好嘞，等功夫茶問問大家，普羅大眾又會唔會因為一套制服而走去做地盤工人呢？
大家可能覺得功夫茶問得非常之咁奇怪，事關地盤工人相信係全世界最唔重視衣着品味嘅從業員，牛記笠記有之，打大赤肋有之，着鞋唔着襪亦都唔覺肉酸又核突。功夫茶之所以問得咁奇怪，源於一個怪到無倫嘅嶄新構思：特區政府話喎，為咗吸引更多人加入建造業，以應付可見將來基建工程嘅發展需要，所以要求政府工程承建商為工人提供制服。
計功夫茶話齋，地盤工人着制服未嘗不可，畢竟制服有制服嘅功能，起碼以資識別防止白撞吖嘛。之但係當你講到話有制服就可以吸引更多人加入建造業，咁就滑天下之大稽嘞。做得地盤工人梗係身水身汗㗎啦，有時更加係污糟邋遢，如果有得揀，工人寧願赤膊上陣，會貪你一套爛鬼制服？
呢個嶄新構思奇上加奇嘅係，政府唔係要求工程承建商自己出錢買制服，而係由官老爺利用納稅人嘅血汗錢免費送上。具體計劃係咁嘅，每名地盤工人可以獲贈一套二十件制服，包括六件長袖衫、六件短袖衫、六條長褲以及兩件風褸，涉及二萬至三萬名工人，成本大約二千萬元。
呢嗱嗱嗱，你話係咪浪費公帑吖？你話係咪形式主義吖？大拿拿二千萬，話多當然唔多，話少亦係唔少，假如攞去接濟窮人都話有意義啫，你無厘頭走去「贈衣施褲」，一來受益者未必會講一句多謝，二來名副其實就係洗腳唔抹腳亂咁揈！
難怪職工盟同工業傷亡權益會異口同聲批評，政府亂花公帑搞形象工程係冇意義嘅，根本冇可能吸引年輕人入行。建造業目前最主要嘅核心問題係工人老化青黃不接，人人害怕有汗出冇糧出，而唔係驚你冇衫畀佢着呀，懵丙！
再講吖，即使工人着制服嘅大方向係正確嘅，未必人人接受得到衣不蔽體擔擔抬抬，係都應該由工程承建商自掏腰包啦，冇理由慷納稅人之慨。
唉，政府官僚睇嚟愈來愈死要面，地盤工人着制服當然係形象工程啦，另一個更加浪費公帑嘅形象工程叫做申辦二○二三年亞運會，估計成本四百億。任得一百二十六萬窮人自生自滅，豪擲四百億元為自己臉上貼金，呢啲咪就係現代版本朱門酒肉臭、路有凍死骨囉！