曾蔭權第六份施政報告發表咗幾日嘞，大家有乜感想冇呢？不如咁吖，睇睇兩項民意調查先啦。
港大民意研究計劃訪問咗五百多名市民，發現對施政報告不滿比率上升，由公布報告當日嘅一成九，增至兩成七，多咗八個百分點。滿意比率又點呢？由最初嘅四成一變到只有三成一，急跌十個百分點。至於整體評分，大幅下跌四點八分，本來係已經唔算高嘅五十八點九分，家陣係低處徘徊嘅五十四點一分。
好嘞，再睇睇另一項調查。社聯發現八成受訪者認為香港貧富懸殊情況嚴重，對施政報告扶貧措施評分為五十一點九分，近半市民認為「扶貧效用小」。社聯行政總裁方敏生就話嘞，有關評分偏低，反映政府一向認為經濟改善能夠帶動基層受惠嘅思維未見效果，要求制訂長遠扶貧政策。
因乜解究施政報告評分咁低嘅呢？原因其實一字咁淺……唔係，應該係話三字咁淺：冇料到。
冇錯嘞，施政報告冇料到吖嘛，市民咪唔收貨囉，評分咪唔慌高囉。就好似重點推出嗰個乜鬼「先租後買」置業大計咁吖，表面上似乎幾幫得手，名堂仲叫做「置安心」添，實際上搵笨搵到冇朋友，簡直就係「置灰心」。
「先租後買」之所以搵笨，首先就係遠水救不了近火。政府撥地房協起樓，最快都話要二○一四年先至入伙，到時候係乜嘢環境冇人答得出。按照計劃係「先租五年」再買入單位榮登業主，即係由二○一○年開始計前前後後搞足你九年，老友，蛇都死啦！
另一搵笨係「置安心」畀你一個虛假期望。喂，話就話政府將租金一半回水畀你做買樓首期啫，之但係金額大不了二十至三十萬銀，目前最普通嘅冇景觀單位郁啲都話二、三百萬，首期三成即係六十至九十萬，仲未計九年之後樓價有機會屢創新高，點夠數呀大佬！
所以咯喎，民協喺施政報告發表之後第一時間走去抗議，喺立法會門外架起「置安心，無本心；市民傷心，財團開心」嘅標語，狠批政府未能回應市民需要，拒絕復建居屋迫使市民捱貴樓。
講到扶貧，功夫茶其實冇嘢講，事關真係冇嘢可以講。施政報告對於扶貧工作冇具體內容吖嘛，一千零一個方法叫做成立「關愛基金」，涉及金額一百億，政府出一半，商家出一半。好嘞，啲錢點用呀？幫得邊個呀？有乜嘢典章制度呀？唔好意思，未諗清楚，一切交由政務司司長唐英年從零開始。空泛成咁，你話嘞，功夫茶有乜嘢可以講吖？
計功夫茶話齋，港人同胞真係非常之咁和藹可親，見到一份咁冇料到嘅施政報告竟然仲有三成一滿意比率，如果換轉係外國，譬如話近日因為不滿政府施政而罷工嘅法國，怕且已經嘈到拆天。
總而言之，無所作為嘅曾蔭權仍然可以喺禮賓府「置安心」繼續住落去，連租都唔使交，算執到o架喇！