中秋可以更快樂　莫讓大坑冇火龍

今年中秋節美中不足嘅係打風唔成三日雨，烏雲密布之下見唔到又圓又大嘅月光光照地堂。不如咁啦，反正天文學家話畀大家聽，今年八月十六先至係月亮最圓嘅時候，大家齊心祝願今晚雨過天青，咁咪有機會賞月囉。如果有興致嘅，更加可以高歌一曲，但願人長久，千里共嬋娟。

每年中秋節港島大坑都會舞火龍，舞咗百幾年㗎喇，由八月十四迎月夜一連三晚舞到八月十六追月夜，名副其實係香港嘅傳統文化。舞火龍除咗具備觀賞價值之外，仲有實際意義，事關相傳十九世紀香港爆發瘟疫，唔知邊位高人提議，不如舞火龍驅趕瘟神啦。哈，果然靈驗喎，火龍一舞，瘟神消失。雖然家陣話就話醫學昌明啫，不過你唔知幾時又爆發群醫束手嘅沙士，死亡率話唔定又冠絕全球，舞一舞火龍起碼有個心靈慰藉吖嘛。

功夫茶因乜事幹咁重視舞火龍？無他嘅，傳統文化買少見少，集體回憶拆得就拆，再加上香港政府官員其實同菲律賓特蠢部隊差不多，愛你等於害你，救你等於殺你，舞火龍隨時變咗冇火龍。

呢嗱，就咁，政府已經將香港四項歷史悠久嘅傳統習俗上報中央，向國家文化部申請列入第三批國家級非物質文化遺產，包括大坑舞火龍、長洲太平清醮、大澳端午游涌以及潮人盂蘭勝會，結果雖然未知，機會相信唔小。

大家可能會話，咁咪謝天謝地謝祖先囉，假使四項傳統習俗列入國家級非物質文化遺產，保育工作有希望咯。正常而言梗係咁啦，問題係香港嘅官僚主義好神化㗎，口講保育，實際絕育。遠嘅唔講嘞，淨係睇睇最近兩單經典案例。

第一單，有富豪想將香港後花園西貢大浪西灣私有化，大興土木破壞自然生態，政府居然傻頭傻腦乜都唔知，連事發現場原來係考古遺址都矇查查，全靠傳媒揭發配合網民怒吼先至暫時喝停。

第二單，今年七月一場黑色暴雨搞到大埔碗窰村毀人亡，更加將大量珍貴文物沖落山腳底，原來當地係擁有幾百年歷史嘅製窰工場，被認定係中國境內唯一保存完整嘅窰場，早於一九八三年被列作法定古蹟。弊傢伙嘅係，差不多三十年以來毫無管理可言，古物古蹟辦事處保護不力，卒之淪為滿目瘡痍。

至於講到今次申請列入國家級非物質文化遺產之一嘅盂蘭勝會，唉，簡直不敢恭維。萬聖節作為西洋鬼節，年年有聲有色，盂蘭節作為中國鬼節，次次愈搞愈縮。保育人士就批評嘞，政府冇做好保育工作，令盂蘭節之類嘅寶貴遺產無法薪火相傳。

不如咁啦，適逢人月兩團圓佳節當前，大家嚟許一個願：中秋可以更快樂，莫讓大坑冇火龍！