大家有冇玩過一種近似「虛擬城市」嘅電腦遊戲？如果你玩過，你一定知道建立一座城市係需要好多設施嘅，譬如話，你一定要有街市，否則你身為一個「虛擬市長」只會睇住居民不斷流失。
街市之所以必不可少，無他嘅，人類係一種唔可以唔食飯嘅哺乳類動物，買餸煮飯梗係要幫襯街市㗎啦。街市又提供好多另類功能，通渠、開鎖、換燈、補鞋、買報紙等等之外，你仲可以同街坊街里閒話家常打牙骹，好多人視之為香港文化一條充滿人情味嘅風景線。
好嘞，既然街市咁重要，領匯轄下嘅公屋街市係咪應該好好管理呀？係咪應該為居民提供生活便利呀？有一個組織叫做「領匯監察」，顧名思義就係監察領匯，最近做咗一項調查，結果相當得人驚，不如大家睇睇數據先吖。
領匯轄下四十三個公屋街市，平均空置率百分之二十三。重災區係沙田嘅新田圍街市，空置率竟然高達百分之八十三，名副其實十室九空。第二位同第三位係深水埗嘅麗閣街市以及葵涌嘅安蔭街市，空置率分別係百分之六十四同百分之五十九。
公屋街市因乜事幹人去檔空？其中一個主要原因係領匯發錢寒，不斷瘋狂加租之下，檔主頂唔順咪執笠大吉囉。其次咯喎，人去檔空梗係人流稀疏㗎啦，冇人買嘢又導致冇人賣嘢，惡性循環嘅結果係領匯採取放棄態度，任得你自生自滅。
假如部分街市係有足夠人流嘅，只不過昂貴租金吸引唔到小商戶，咁又點呢？領匯絕對係唯利是圖，所以索性不務正業，竟然將街市租畀非傳統項目，例如老人院，例如補習社，例如迷你倉。
領匯仲有一招好毒辣，將街市租畀大型連鎖超級市場，直接趕絕小本經營嘅檔主。咁都未算㗎，「領匯監察」又踢爆領匯涉嫌利益輸送，將街市管理權外判畀承包商之後，容許承包商先將小商戶趕走，繼而由所屬嘅超級市場進駐，同剩落嚟嘅街市檔口惡性競爭。
「領匯監察」得出一個結論，領匯忽視公屋街市原本嘅社會功能，漠視社區生活需要，任由影響民生需要嘅街市長期空置，亦任意改變公屋街市嘅用途。即係咁，假如你係公屋居民，你隨時有必要山長水遠走去隔籬邨先至可以買到柴米油鹽煮飯仔，後生仔女就話冇乜所謂啫，對於手騰腳震嘅公公婆婆嚟講，簡直就係一步一驚心嘅長征歷險之旅。
計功夫茶話齋，領匯見錢開眼懶理民間疾苦都唔係第一次㗎喇，街市又瘋狂加租，商場又瘋狂加租，酒樓又瘋狂加租，連停車場都唔放過，瘋狂加租已經係例牌動作。點先至可以為公屋居民謀福祉呢？「領匯監察」有一個十分好嘅提議，政府必須回購領匯！
街市搞到一塌糊塗吖嘛，唔通你叫街坊去老人院買半斤豬肉？莫非你叫師奶去補習社斬大舊叉燒？所以咯喎，政府回購領匯先至係徹底解決問題嘅辦法。如果政府拒絕回購咁又點呢？功夫茶有少少擔心有人會去禮賓府斬大舊叉燒咁解囉！