大家記唔記得冇耐之前有富商企圖將香港十大勝景之首嘅西貢大浪西灣私有化？點解呢件事惹起市民咁大回響？無他嘅，以石屎森林聞名於世嘅香港，自然生態環境買少見少，難得仲有幾個鳥語花香嘅世外桃源，吊頸都想抖啖氣嘅香港人梗係珍而重之啦，冇可能任由財大氣粗嘅有錢人據為己有。
好嘞，既然大浪西灣私有化咁討厭，假如有人話要將郊野公園變成垃圾堆填區，大家有乜嘢感想呢？功夫茶第一個感想就係，死開！躝開！彈開！唔做得破壞自然！
環境局都算顛三倒四咯，不但冇好好保護環境，反而處處與民為敵。局長邱騰華話喎，將軍澳堆填區即將飽和，所以有必要徵用鄰近嘅清水灣郊野公園五公頃土地，作為堆填區擴建之用。
喂！大佬！如果咁都得，局長官邸係咪又可以用嚟倒垃圾呀？對於呢個咁瘋狂嘅建議，不但將軍澳居民極力抗拒，保育人士亦齊聲反對，難得立法會議員順應民意。泛民同建制陣營嘅六大黨派罕有地聯手提出議案，要求廢除將清水灣郊野公園用作擴建將軍澳堆填區嘅法令，議案安排喺下星期三施政報告發表當日表決。你知啦，香港政客平時狗咬狗骨，好少見到放下分歧一致槍口向外，既然今次同心協力，反映侵佔郊野公園嘅做法係幾咁令人反感。
你以為立法會夠票否決啦，點不知，環境局聯同律政司使橫手，耍出一招大石砸死蟹。律政司去信立法會秘書處話喎，如果行政長官會同行政會議已批准剔出郊野公園範圍，而又已經提交土地註冊處，有關指令必須執行，就算行政長官亦只可以就指令嘅生效日期酌情處理，無權廢除指令，因此即使立法會通過廢除有關指令都係冇法律效用嘅。換言之，議員無權否決，特首無權叫停，滿天神佛閻王老祖都冇面畀，嗰一條《二○一○年郊野公園（指定）（綜合）（修訂）令》必須如期喺十一月一日生效。
嘩嘩嘩！有冇惡得咁交關呀！天要下雨、娘要嫁人、五雷轟頂就話冇人可以阻止啫，侵佔郊野公園呢種野蠻行為居然連議員同特首都話唔可以廢除？香港幾時變咗一個獨裁成咁嘅專制社會？
莫講話備受臭氣困擾嘅將軍澳居民激到生蝦咁跳，普通小市民同樣大惑不解，你今次話徵用土地事在必行，下次會唔會話徵收重稅又係無人可擋㗎？再下次，你話有必要徵用人頭，香港人容乜易死得不明不白！
唉，好心邱騰華唔好咁矯枉過正啦。高官民望冇錯係好低，特區政府的確係弱勢，推出政策措施一次又一次遇到阻力，派慳電膽現金券嘅構思啱啱先至玩完，咁都唔使忽然之間硬起來，扮晒叉燒強政勵治吖，眾怒難犯呀！
計功夫茶話齋，一意孤行唔代表強政勵治，與民為敵不等於宇宙最強。你試下真係夾硬侵佔郊野公園野蠻擴建堆填區吖，你試下真係繞過立法會監察吖，你試下真係唔畀特首廢除指令吖，功夫茶應承你，吹雞包圍環境局！