潮流興講仇富仇商，勞工權益成為全城熱議嘅焦點話題。公道講句，中國人承傳儒家思想，大部分商人都係求財有道嘅，只因小部分無良商戶壓榨員工，一粒老鼠屎，整臭成煲粥。而呢啲奸商可以為所欲為，根本就係政府長期縱容嘅惡果。尤其係食環署轄下嘅外判員工，不時傳出奴工悲歌，首首新鮮，首首辛酸，真係聽到都覺得心噏。
最近又有區議員反映，由於食環署嘅外判清潔承辦商涉嫌將承辦合約中嘅違規罰款轉嫁畀工人，唔少外判清潔工因為被指工作時行為不當被罰款，每次罰款額由六百幾至三千七百幾元不等，有關行為多達幾十項，包括懶散、傾偈、食嘢、睇報紙……名目繁多，不能盡錄，總之諗得到嘅都有，諗唔到嘅亦有。
到底呢啲行為有幾「不當」？講起就荒唐咯，譬如有工人落雨時工作濕身，換過衫後唔記得戴番個名牌，咁就犯咗「未有正確佩戴名牌」嘅天條，款罰六百七十七元。最慘嘅係夜班清潔工，連食飯時間都冇，肚餓時食個麵包呢，竟然又係「不當行為」，又要罰錢。好明顯，喺奸商眼中，啲基層員工唔係人，係機器，可以唔使食嘢不斷工作，周不時仲可以巧立名目榨啲油水出嚟，果然好使好用。
難怪區議員大發雷霆，指前線員工本身已經係低收入階層，每月人工得嗰三幾千元，假如犯咗一項所謂「嚴重失職行為」，就會畀公司扣晒成個月人工，叫佢哋點生活呢？計功夫茶話齋，外判奸商貪得無厭，喺乞兒兜搶飯食，簡直就係吸血！
正因為外判清潔工收入微薄，為咗幫補生計，只好將垃圾分類賣畀收買佬，唔少居民同情佢哋，主動將可回收嘅衣物、廢紙送到垃圾站。之但係，喺外判商眼中，呢啲又係不當行為、罰款藉口。
外判奸商挖空心思剝削員工，基層奴工敢怒不敢言，但係作為大老闆嘅特區政府，點都有責任伸張正義啩？死得佢吖，雖然勞工處認為外判商嘅做法違反《僱傭條例》，但食環署至今未有實際行動。
不過，呢種情形一啲都唔奇怪，因為對特區政府嚟講，外判嘅目的就係卸責，工作外判，責任亦外判，所以就算外判商涉嫌違法，就算基層奴工遭受剝削，佢哋都係懶懶閒咁。
唉，講開近年食環署嘅工作表現，可以話係「有口皆悲」，監管外判商一塌糊塗，經營街市年年勁蝕，正經事冇件做到，反而醜聞、笑話就長爆長有。有女遊客喺中環被老鼠咬傷，廣州鼠王事後到現場視察，結論係食環署滅鼠全方位失敗，清潔失敗、落藥失敗、監管失敗、跟進失敗、堵截失敗。最搞笑係早前錄得登革熱本土感染個案，食環署居然「扯蚊旗」投降，叫市民慎防蚊患同登革熱喎。
食環署搞成一個爛攤子，前署長卓永興拍拍屁股走人，財經事務及庫務局副秘書長梁卓文尋日啱啱正式接任食環署署長，就爆出剝削外判工嘅醜聞。不如咁，為咗督促梁卓文撥亂反正，功夫茶建議設立官員罰款制度，以後食環署每爆一次醜聞，署長就扣一次人工，相信大家都好支持㗎。