嘩嘩嘩！迷幻司機又闖禍，而且一日之內接連發生兩宗，名副其實禍不單行，你都咪話唔得人驚！
尋日早上七點幾喎，一架私家車喺元朗公路近博愛醫院撞壆失事，其他司機見狀即刻報警。警方到場之後發現，肇事司機鼻孔沾有白色粉末，而且精神狀態迷迷糊糊，十居其九梗係索Ｋ索到傻咗啦，警方隨即以涉嫌藏毒同埋藥後駕駛罪名拘捕歸案。
到咗下午一點半左右，更加恐怖嘅事情發生嘞。一部來往跑馬地同銅鑼灣嘅30號專線小巴，載住十幾名乘客頭搖又尾擺，簡直舞龍咁舞。如果你唔好彩係車上乘客，你會點做呢？冇錯嘞，嚇破膽嘅你會保住命仔要緊，即刻揚聲要求司機停車有落。問題係，呢個司機呆呆滯滯冇乜反應，仲搞到飛站添。就喺呢個十萬火急嘅危險關頭，車內乘客都算醒目咯，趁住車速比較慢嘅時候自己打開車門大逃亡，唔理三七二十一全人類齊齊落車！
說時遲，那時快，當乘客雞咁腳離開車廂之後冇幾耐，砰嘭一嘢，專線小巴溜前十米撞向泊喺路邊嘅私家車。計功夫茶話齋，呢班醒目乘客唔止救咗自己，其實亦可能救埋嗰個司機。大家試諗諗，如果唔係有人臨危自救大聲喝停，任得司機繼續高速飛馳，後果真係不敢想像㗎！
跟住落嚟嘅例行情節都唔使點樣多講咯，警方到場又係發現肇事司機神志不清，又係發現鼻孔沾有白色粉末，當然又係以涉嫌藏毒同埋藥後駕駛罪名拘捕歸案啦。
唉，醉酒駕駛已經害人不淺，家陣仲愈來愈多人藥後駕駛，莫講話車上乘客驚到鼻哥窿冇肉，查實路上行人同樣危在旦夕，萬一迷幻司機當你係人肉保齡球亂咁撞，咁就真係無辜辜加個箍。
點樣先至可以杜絕迷幻司機橫衝直撞呢？香港九龍新界小巴聯合總商會主席梁雄有一個值得考慮嘅提議，佢話喎，不如好似校園驗毒計劃咁樣，要求入職小巴司機驗毒，一旦發現有索Ｋ習慣咯喎，梗係唔畀佢坐上司機位啦。
之不過咁，入職驗毒未必係萬全之策，除非你每日開工之前都驗一驗毒嘅啫，否則始終會有司機成為漏網之魚。
歸根究柢講到尾，治亂世必須用重典，最有效嘅阻嚇辦法莫過於加重刑罰。譬如咁講吖，有人索Ｋ之後撞死人，如果你以誤殺甚至謀殺罪名控告佢，隨時踎監踎足大半世，睇怕都冇乜邊個膽生毛再敢藥後駕駛。
唉，話時話，家陣對於醉駕以及藥駕嘅刑罰有時真係輕到不成比例。就好似舊年年初落馬洲大車禍咁吖，一名醉酒貨車司機撞到一架的士，導致車內六人全部死亡，六個家庭忽然之間支離破碎，法官最終只判殺人兇手入獄六年，平均一年貨仔填一命。你話嘞，判罰係咪輕到離譜吖？
總而言之，不用重典難治亂，你唔想見到醉酒佬危害百姓咩？你唔想見到索Ｋ男禍及無辜咩？快啲加重刑罰啦，唔該！