衫可以亂着，話可以亂講，但藥就唔可以亂食。愈來愈多人要靚唔要命，為咗減肥不顧後果，亂咁食藥，亂咁啪丸，結果減肥減出禍，有人食到傻，有人連命都冇埋，問你怕未。
原來喺香港，減肥產品幾乎無王管，好多並冇列明成分，話就話含「天然成分」，查實唔少都攙雜西藥甚至禁藥，食咗分分鐘出事。
醫管局分析咗最近六年六十幾宗服食減肥產品後入院個案，其中一人死亡、一人因肝衰竭要換肝，十六人因服食含減肥西藥西布曲明產品而出現精神錯亂。食減肥藥「食到傻」嘅比率，香港居然較全球平均數字高四千幾倍，簡直可以列入健力士世界紀錄大全。
西布曲明係處方藥物，服用之後會出現失眠、頭暈、心肌梗塞、高血壓等病徵，心臟病及中風嘅風險大幅增加，歐盟同美國已經先後禁用，但本港仲係無王管，講都冇人信。
呢，目前生產含西布曲明減肥藥嘅本地藥廠，已經多達二十間，美國一間藥廠穩陣起見，主動向衞生署取消呢種產品嘅註冊添。但勢估唔到，衞生署依家仲未決定禁唔禁西布曲明，你話係咪靠害吖？
該禁唔禁已經夠晒離譜，更離譜嘅係，衞生署居然歎慢板，係都要等到減肥產品賣通街，先至喺市場買嚟慢慢檢驗，發現含受管制藥物成分，至會公布。
咁分明搵市民做白老鼠啫。有心監管點解唔採取主動，事先檢驗過至畀呢類產品進入市場吖嘛，賊過興兵有鬼用咩！如果產品有問題，等呢班食咗成擔豬油嘅懶官採取行動，蚊都瞓，蛇都死，不知幾多市民中招啦。再講，連西布曲明應唔應禁都未有定論，檢驗又有乜意義吖？
講開又講，衞生署監管失職，藥物事故不斷，過期藥、發霉藥，五花八門乜都有；中成藥就算未完成註冊程序，照樣可以賣通街。你話嘞，當局有邊鑊唔係衰被動㗎？
年初百年老字號生產嘅保濟丸，部分產品驗出含致癌禁藥同西布曲明，當局矇查查，等新加坡當局下令回收有關產品，衞生署至如夢初醒，足足慢咗幾拍。
仲有，近年壯陽藥賣到成行成市，經常搞出人命，衞生署詐唔知，一直唔監唔管。更匪夷所思嘅係，早排本港一間藥廠居然喺停牌期間藥照做，貨照賣，完全當衞生署冇到。有人話衞生署係無牙老虎，其實係紙老虎就真。
古人話，楚王好細腰，宮中多餓死。依家香港嘅情況亦差唔多，食減肥藥食到傻，甚至連命都冇埋。計功夫茶話齋，問題藥物醜聞停不了，藥商同藥廠固然難辭其咎，衞生署監管失職，更加罪無可恕，請問署長林秉恩使唔使負責呢？請問食衞局局長周一嶽又使唔使問責呢？