政情：方保僑四部手機跟身
iPhone 4出街後問題多多，但尋日凌晨喺香港推出行貨版時依然令潮人趨之若鶩，有人為買得心頭好不惜排成晚隊，IT界亦有好多捧場客。好似資訊科技商會會長方保僑咁，尋日就買咗部機後即時喺facebook公布，仲話自己係iPhone死硬派支持者，之前雖然買咗Samsung最新智能手機Galaxy S，但今次都向兩間電訊商訂貨，一部畀自己、另一部幫朋友買。
有說iPhone 4設計出問題，接收唔多好，方保僑就話冇有怕，因為早幾個星期已去日本買咗幾個iPhone 4外殼，早有準備。佢又話，iPhone 4嘅接收問題同電訊商嘅表現好有關係，而香港電訊商嘅訊號一般較強，加上用咗外殼，相信唔會有大礙。
方保僑仲即時展示咗身上嘅電子產品，原來佢隨身攜帶四部電話同一部iPad，佢玩咗部iPhone 4之後覺得個處理器好勁，畫面又靚，所以即使要凌晨去拎部機都係值得喎，大家真係要試過至知喇！