一醜未平一醜又起，富山公眾殮房啱啱發生男女不分劏錯屍事故，瑪嘉烈醫院又被踢爆將嬰屍隨地丟醜聞，真係鑊鑊新鮮鑊鑊甘。
件事係咁嘅，一名嬰兒喺瑪嘉烈醫院夭折，屍體由外判員工送去殮房，由於殮房未開工，員工將嬰屍連車放喺門口，但係冇依照程序填寫表格通知殮房職員，結果直到第二日下晝至被發現，嬰屍喺室溫下漚足三十八個鐘，傳出陣陣臭味。
其實，同類事件已經唔係第一次發生，舊年東區醫院將男嬰屍體當垃圾丟咗，警方出動廿幾人喺堆填區搵足一個禮拜都搵唔番。
公營醫療機構屢爆大鑊，食物及衞生局局長周一嶽仲喺外地逍遙快活，副局長梁卓偉惟有出嚟受靶，除咗例牌道歉之外，仲話對事件感到好痛心，要求醫管局兩周內提交報告喎。其實，最痛心嘅肯定唔係高官，而係死者家屬，嬰兒夭折已經大不幸，點知仲要咁樣畀人糟質，簡直係傷口灑鹽，痛上加痛。
值得一提嘅係，呢單畸士原來另有內情，涉事員工係一位智障人士，事後極速畀人炒咗。梁卓偉認為，外判公司將涉事員工解僱係外判公司嘅人事安排，同醫管局完全無關。
開講有話，錯就要認，打就要企定。前線員工犯錯，當然應該承擔責任，但係醫管局仲未開始調查，咁快就炒人，係咪另有原因呢？正如有人懷疑，外判商急急炒人，係為咗淡化事件，唔畀涉事員工面對醫管局聆訊。甚至有醫管局前線員工替被炒員工抱不平，質疑當局根本係搵代罪羔羊「祭旗」。
呢啲質疑唔係冇道理，事故喺公立醫院發生，無論涉事員工係咪外判，醫管局都難逃監管不力嘅責任。尤其今次涉事嘅係一位智障人士，院方管理層事前有冇衡量過佢適唔適合做呢份工呢？有冇為佢提供培訓呢？無論點講都好，今次事故管理層絕對難辭其咎。
話時話，有醫院同事踢爆，呢位智障人士已經喺同一崗位工作七年，一直盡忠職守，醫管局咁樣對待智障人士，究竟有冇涉及歧視，平機會係咪應該查一查呢？
有人認為，連串涉及遺體事故反映機構文化有問題。其實，更加準確啲講，唔止機構文化有問題，而係成個官僚文化都有問題。醫療高層平時監管不力，出事後就搵基層員工孭鑊，點可能解決問題，又點可能杜絕事故吖。
呢，上次東區醫院遺失嬰屍，涉事員工唔止被革職，仲遭到刑事檢控，教訓都夠重喇啩！之但係，事隔年幾，同類事件咪照樣發生。醫管局一錯再錯，而且愈錯愈離譜，證明佢哋根本係冥頑不靈，知錯不改。
近年嚟，公立醫院事故不斷，殮房醜聞頻生，連監管骨灰龕場都搞到一鑊泡，食衞局班高官劣迹斑斑、一事無成，幾時先輪到佢哋被炒呢？