好嘢好嘢！恭喜恭喜！又有人為港爭光！
咦，功夫茶係咪講緊喺廣州亞運贏咗強隊烏茲別克嘅香港足球代表隊？冇錯，港足今次真係好叻仔，起碼勁過輸咗畀日本嘅國足先吖，之不過咁，功夫茶講嘅另有其人。
呢嗱，為港爭光嘅係香港大學化學系講座教授任詠華，榮獲今年聯合國教科文組織婦女與科學獎。呢一個獎項，有人稱之為「女性諾貝爾獎」，可想而知江湖地位非同凡響。全球有五位傑出女性科學家得獎，任詠華係其中之一，獎金十萬美元，即係七十八萬港元。聽講，任教授會將大部分獎金投放於研究之中。
任詠華嘅得獎原因係乜呢？一提到化學，功夫茶就一頭霧水，惟有做一做文抄公——任詠華因為發光材料研究和太陽能創新技術而獲獎，研製的是可發光分子，用途包括ＯＬＥＤ（有機ＬＥＤ）以及太陽能電池等等。ＯＬＥＤ可製成耗電量低的燈泡，８Ｗ的ＯＬＥＤ光度就相當於60Ｗ鎢絲燈。
好嘞，抄完，係時候講一講感想。
功夫茶嘅感想就係，唉，香港唔係冇人才，可惜經常被糟蹋。睇番所有同香港有淵源嘅傑出科學家，就好似光纖之父高錕咁吖，係就係香港受教育，不過要去到英國先至有機會發光發熱，最終得到一個遲來的諾貝爾獎。
點解香港嘅高等學府往往培養唔到世界一流嘅優秀人才？其實睇睇任詠華對於獎金嘅用途就略知一二，佢會將大部分獎金投放於研究之中，反映政府提供嘅資源極之不足。
嗱，唔係功夫茶靠估㗎。冇耐前之嘛，浸會大學校長陳新滋公開表示，政府投放於大學嘅研究資源有限，遠低於新加坡、台灣及南韓等地，令本港研究生人數偏低，浪費高質素嘅教授及大學。陳校長又話，大學好多研究成果都用於社會，如果能夠投放更多資源，可造就更多科研人員，加強科研成果效益，長遠有利經濟及社會發展。陳新滋更加一針見血咁質問：「如果將年輕人當自己嘅仔女，你會唔會慳住啲錢唔畀佢哋用？」
成日都話，再窮不能窮教育，再苦不能苦孩子。激到你嘔血嘅係，香港官僚作風絕對係又懶又孤寒，教育局居然話恐防經費增加而堅決拒絕中學推行小班教學喎。首先，庫房唔係話冇錢，所謂增加嘅經費講緊幾百億之嘛，簡直濕濕碎。其次，你唔好聽佢哋誇大其詞呃鬼食豆腐啦，學生人數明明少咗，經費有乜可能大增？
辦教育係一條龍嘅百年大計，由幼稚園到小學到中學到大學再到研究院，中學都唔肯揼錢推行小班教學，大學亦都唔使奢望佢增撥資源。至於研究院咯喎，咪好似任詠華咁囉，喺資源不足之下憑一己努力贏到獎金，然後將獎金循環再用。
香港空有好人才，英雄無用武之地。所以話啫，任詠華呢一位傑出學者今次為港爭光，其實間接摑咗香港官僚一大巴。好心曾蔭權政府唔好浪費公帑申辦亞運，留番啲彈藥培養人才好過啦！