港燦同胞北上或者內地同胞南下，已經係絡繹於途嘅日常生活形態，中港一家親嘛，正所謂血濃於水、你中有我、我中有你。之不過咁，近日深圳海關出現一連串不尋常動作，搞到人心惶惶，簡直風聲鶴唳。
乜嘢動作咁得人驚呢？即係咁，內地執法部門唔知黐咗邊一條筋，居然嚴格監管外國名牌貨品，譬如iPhone、iPad以及名貴手袋等等一律列作打稅項目，稅率由十幾巴仙至二十幾巴仙不等。如果你係香港人，攜帶價值二千元以上物品入境就有機會被徵稅；如果你係內地客，攜帶五千元以上物品回程亦有機會被掠水。執法部門磨刀霍霍，「名牌稅風暴」應運而生。
之所以有咁嘅苛刻做法，據估計主要原因係兩個。第一個原因係打擊水貨，唔畀你喺香港購物帶返內地變賣圖利吖嘛；第二個原因係保護國貨，嚴格監管外國名牌貨品咪可以畀國貨有一個更大嘅生存空間囉。當然啦，徵稅條例講明自用嘅個人物品可獲豁免。
計功夫茶話齋，打擊水貨冇話唔啱嘅，問題係，你點樣分辨乜嘢係圖利水貨，乜嘢係個人物品？舉個例吖，假設功夫茶係攝影發燒友，亦即係俗稱嘅龍友，北上旅行隨身攜帶一部價值幾千元嘅小型數碼相機，另加一部價值上萬元嘅單鏡反光機，仲未計幾支貴價鏡頭，萬一深圳海關認為功夫茶係水貨客，抽稅抽到一頸血咪好無辜？
難怪中港兩地近日怨聲載道，事關香港人二千元、內地客五千元嘅寬免上限實在少得離譜，試問家陣邊個冇手提電話？又試問邊一部手提電話價值低得過二千？如果揸正嚟做，手提電話都要徵稅，咁就真係苛政猛於虎咯！
更加啼笑皆非嘅係，假如閣下用嘅係偽冒外國名牌嘅Ａ貨，深圳海關有權以正貨正價向你抽稅，而你係唔可以擰頭擰髻以「冤枉呀大老爺，我用嘅係假嘢」作為抗辯理由，點解？因為持有冒牌貨品觸犯版權法例，罰款比稅款更高！
總而言之，名牌稅風暴疑慮重重，點樣證明係個人物品？貨品如何定價？同一物件會否多次打稅？仲有一個影響極之深遠嘅問題，內地同胞一旦怯於名牌稅風暴，唔再嚟香港購物，會唔會玩殘旅遊業㗎？
嘩嘩嘩！講到玩殘旅遊業，呢鋪真係大大鑊。你知啦，香港成個旅遊業基本上由源源不絕嘅內地同胞撐起，幫襯尖沙咀一級名店居然要排長龍咁大陣仗，若然深圳海關真係鐵石心腸抽重稅，仲要係針對性招呼外國名牌，傻嘅都會望而卻步啦，一級名店等住拍烏蠅都得咯！
所以話啫，香港特區政府唔應該坐以待斃，畢竟旅遊業係經濟一碌大支柱，不知幾多人包括導遊阿珍等住佢開飯。點樣先至能夠避免坐以待斃呢？計功夫茶話齋，政制及內地事務局局長林瑞麟唔可以再游手好閒嘞，亦唔應該繼續飾演悶不可耐嘅人肉錄音機，一於要同北大人講講數，最低限度要爭取個人物品價值上限大幅提高吖嘛。如果話局長大人冇呢個講數能力，不如咁樣嘞，林瑞麟落台，改由導遊阿珍做局長，睇怕牙力一定有番咁上下！