喺香港，高官嘅「高」字有好多種含意，除咗地位高、身份高、人工高，更大嘅特色就係高高在上。正因為佢哋高高在上，淨係識得匿喺冷氣房閉門造車，所以，推行政策周不時脫離現實，添煩添亂。
呢，佢哋又嚟添煩添亂喇。鑑於近年經常發生冧樓、冧僭建物、冧招牌等等傷亡事故，港府修訂《建築物管理規例》，強制大廈業主立案法團為樓宇公用部分購買第三者保險，新例將於明年一月一日起生效。本來呢，強制業主立案法團購買第三保，既可保障市民利益，更可保障業主利益，本來係無可厚非嘅，問題係至今仍有大約三百幢已成立法團嘅大廈未買第三保，好多法團成員為免負上法律責任，紛紛劈炮甚至解散法團。
對此，民政事務總署署長陳甘美華話喎，劈炮或者解散法團唔能夠解決問題，反會令大廈狀況變差，如果發生意外，業主一樣要賠償，每戶隨時要承擔數十萬元，仲貴過保費。
嗱，呢啲咪叫官僚囉。法團成員劈炮甚至解散法團，一定係有苦衷，高官唔去了解佢哋嘅難處，幫佢哋諗辦法解決問題，反而一味靠嚇，業主聽到唔火滾就假！
正如有法團成員話齋，法團工作無錢收，反而要承擔法律責任，好唔公平，所以唔少成員索性賣樓搬走。有位法團主席就講得啱嘞，大廈要收齊維修款項已經好難，收保費難上加難，新例等於逼佢解散法團，免得惹禍上身。
其實，大部分未買第三保嘅法團唔係唔肯買，而係因為樓宇有僭建物等潛在風險，根本買唔到保險。有法團成員投訴，大廈外牆有兩個危險招牌，擔心保險公司拒絕受保，於是向屋宇署求助，而署方竟然以「無即時危險」為由拒絕處理。喺咁嘅情況下，業主立案法團叫天不應、叫地不聞，根本無計可施，又點樣買保險吖！
話時話，只要高官肯放低身段，了解業主嘅苦況，然後推出適當措施協助，任何問題總有解決嘅辦法。可惜，呢條新例○七年已經刊憲，民政署拖到最近至話會協助法團進行維修，令大廈符合保險公司要求喎。明明係港府平時唔做嘢，臨急抱佛腳，竟然將責任推晒畀小業主，你話係咪好荒謬，好野蠻呢？
再講，已成立法團而未買第三保嘅樓宇固然有機會出事，但全港仍有二萬幾幢未成立法團嘅樓宇，其中大部分仲係日久失修嘅舊樓，更加係危機重重，點樣拆除呢啲都市炸彈呢？當局至今未有任何對策，簡直係本末倒置。
唉，立例規定業主購買第三保，保障樓宇安全，本來係好事，但交到港府高官手上，隨時變成壞事。唔係咩？新例仲未實施，已經搞到小業主怨聲載道，真係冇眼睇！