好好好！讚讚讚！香港人係得嘅！
因乜事幹功夫茶咁興奮呢？就咁，接連兩單好人好事吖嘛，反映香港人愛心爆棚，行善最樂，福有攸歸。比較遺憾嘅係其中一位善心好人不幸魂歸天國，唉，英雄殉難！
大家都清楚記得中國青海玉樹地震之後有一位港人義工黃福榮，不顧危險拯救孤兒嘅時候壯烈犧牲，捨身成仁嘅故事感動全國。原來同黃福榮一樣充滿菩薩心腸嘅港人義工仲有好多，一位叫做曾敏傑嘅志願人士就千里迢迢走到災區雪中送炭。曾敏傑不但喺北京創辦兒童成長中心，更加毅然放下公司擴充大計，親自帶備帳篷、棉鞋同火爐等等物資送去玉樹，佢嘅信念係：「冬天到了，一定要為孩子們做點甚麼！」
可惜天意弄人，荊棘滿途，山路崎嶇，曾敏傑駕駛嘅越野車衝落山坡，車內五人三死二傷，死者包括呢一位令人感慨動容嘅港產英雄曾敏傑，享年三十五歲，絕對天妒英才。
講到呢度，功夫茶真係有少少眼濕濕，難得曾敏傑嘅太太馬菁十分堅強，佢強忍淚水表示：「他會是天堂裏最善良的那一個，我們要把他未做完的事情做下去，而且要做好。」
至於另一件好人好事，就係咁嘅，有一位叫做袁偉祥嘅海關關員，緝捕私煙集團嘅時候不慎撞爆肝臟，陷入昏迷之後情況急轉直下，肝功能只剩不足兩成，直情係危在旦夕。就喺呢個緊急關頭，整個海關發揮民胞物與嘅大愛精神，五十幾人排隊表示願意捐肝，名副其實兄弟情深肝膽相照。如果計埋熱心市民，願意捐肝嘅人數超過八十。當然啦，願意捐肝唔代表一定有用，要視乎好多因素㗎。都算好彩咯，最終搵到一位最適合嘅捐肝者，海關督察許細文，負責做手術嘅瑪麗醫院第一時間開刀，經過十三小時同死神搏鬥，醫生公布一個令人興奮嘅天大好消息：手術成功！
對於呢一位無私奉獻嘅許細文先生，功夫茶致以無限敬意。聽海關關長袁銘輝所講，許細文同袁偉祥原來係未曾共事過㗎，你話嘞，呢種義氣仔女係咪難能可貴吖？
天地有情，人間有愛，容許功夫茶講多次：好好好！讚讚讚！香港人係得嘅！
咦咦咦，咪住先，特區政府都有一個扶貧大計喎，叫做乜嘢關愛基金，耗資一百億元㗎，莫非曾蔭權都想做一做救人英雄？如果真係咁就一天都光晒，一百二十幾萬窮苦大眾有望逃出生天，情況應該好過玉樹嘅地震災民啩。
等功夫茶打電話訪問一下曾英雄先，借問聲，關愛基金會點樣扶貧呢？百億善款又如何救人呢？喂喂喂，英雄呀英雄，你畀少少反應吖，唔該係咁意答一答……唔好意思，禮賓府斷線。
點都好啦，功夫茶確係好高興見到民間救人多英雄，雖然特區政府繼續孤寒成性扶貧乏力，空有關愛基金嘅偉大構思又苦無良策救苦救難，反映官方扶貧多的是蠶蟲師爺，不過都無礙大家向真正嘅港產英雄致敬。好好好，一二三，敬禮！