功夫茶問問大家，有冇讀過人類進化史？冇讀過唔緊要，等功夫茶好簡單咁講一講。遠古猿猴進化為現代人類嘅過程之中，最重要係三件大事，第一：你對腳識得直立行走；第二：你隻大拇指曉得同其餘四隻手指對合，否則你冇辦法製造或者使用任何精巧工具；第三：你能夠從錯誤之中學習。
如果要喺三件大事之中專揀一件，功夫茶認為最最最重要嘅係從錯誤之中學習。你知啦，唔跌過就唔識行路，唔燒過就唔識避火，中國人如果未見識過共你家產大鑊飯原來係咁禍國殃民，就唔會走出改革開放嘅光明大道。
好嘞，既然從錯誤之中學習係咁重要，口口聲聲話要福為民開嘅特區政府係咪要吸取教訓，唔好畀自己一錯再錯呀？理論上當然係啦，之不過咁，功夫茶愈來愈懷疑香港官場充斥大量未進化嘅猿人，所以吸取教訓難比登天。
呢嗱嗱嗱，大家應該記得今年七月一場黑色暴雨曾經無情蹂躪大埔沙埔仔村，大埔河沖出一發不可收拾嘅特大洪水，不但搞到滿目瘡痍，更加將一名村民捲走，最終成為碧海浮屍。悲劇到底係咪純粹天災咁簡單呢？當然唔係啦，事關村民指摘其實係大埔河上游嘅渠務署工程導致河床收窄，黑雨一到，疏導不及，咁就害死人嘞！
直情係一波未平一波又起，街坊街里最近又有驚人發現，大埔河下游居然出現懷疑非法傾倒建築廢料同垃圾，搞到河道淤塞，恐怕隨時又整一鋪洪水浩劫！
邊個傾倒疑似建築廢料咁無良呀？咪就係渠務署嘅承建商囉。根據渠務署發言人嘅講法，大埔河近運頭塘邨一段河道早前受大雨沖刷損毀，承建商八月開始維修，工程預計今年十二月完成。發言人強調，有關工程只屬一般維修，同大埔河近沙埔仔村嘅河道治理工程無關，不過承認承建商曾經喺河堤放置不適當物料，導致河道出現垃圾，當局已經責成承建商清理並加強地盤管理。
唉，呢啲就係叫做唔識得從錯誤之中學習。上次已經村毀人亡o架啦，因乜事幹仍然縱容承建商放置不適當物料呢？責成有鬼用咩，官老爺如果唔拎起一碌大棍兜頭兜腦摳落去，見利忘義嘅商家佬照例係唔會睬你嘅。
話時話，上次村毀人亡到底有冇人要負責？發展局局長林鄭月娥委任水利專家進行嘅獨立審核報告係就係完成咗，不過可惜吖，發展局話喎，由於死因庭好大機會召開死因研訊，為免影響警方刑事調查，所以現階段不會公開報告嘅具體內容。即係話，玩神秘，硬係唔話過你知天災究竟係咪人禍。
咦，既然話官場猿人唔識得吸取大埔洪水殺村民嘅教訓，咁咪即係「洪水猛獸」夾手夾腳遺禍人間？計功夫茶話齋，猿人呀猿人，猛獸呀猛獸，乖乖地進化啦，假如真係完全冇辦法從錯誤之中學習，咁就麻煩閣下返去深山茹毛飲血，唔好留喺度害到街坊街里雞毛鴨血！