嗱嗱嗱，又係時候同大家溫故知新，知唔知根據現行法例，違反《淫褻及不雅物品管制條例》會有乜嘢後果？發放不雅物品係刑事罪行，初犯者一經定罪最高罰款四十萬元及監禁一年，再犯者最高罰款八十萬元及監禁一年。
好嘞，大家又記唔記得壹淫媒前前後後違反過《淫褻及不雅物品管制條例》幾多次？請恕功夫茶唔係幾好記性，事關次數實在多到罄竹難書，總之就係過百次。
正所謂，江山易改，本性難移，淫賤不可移嘅壹淫媒又嚟傢伙，旗下網站今次藉詞以「如何自行檢查乳房」為名，播放一套女子裸露胸部短片，四分鐘片段全程冇打格仔，大特寫加上搓揉按壓等等動作，結果被淫審處評為第二類不雅物品，理論上監都有得你坐。
之不過咁，唔講大家應該都諗到啦，百擒百縱嘅邪惡積犯再一次得到港英餘孽包庇縱容，以前係輕罰了事，今次係索性唔罰。影視處話喎，相關網站已經加上適當警告字眼，所以唔會有任何檢控行動。總而言之又係公然放生不斷犯法嘅壹淫媒，淫賤黎依然故我逍遙法外。
唉，助紂為虐咪就係咁解囉，一個宣淫販賤，一個姑息養奸，彼此臭味相投。
既然壹淫媒有後台撐腰，淫賤黎直情有免死金牌，打不死嘅特異功能勁過曱甴，計功夫茶話齋，包庇淫媒包到底，販賤何妨販到西。咁即係點呢？即係話，一件污兩件穢，一不做二不休，今次教你如何檢查乳房，下次教你如何檢查子宮癌，再下次咯喎，教你如何檢查痔瘡，咁咪可以繼續掛羊頭賣狗肉囉。你知啦，呢個世界除咗正常嘅好色之徒係淫賤黎好朋友之外，唔太正常嘅變態之徒亦係佢嘅忠實粉絲，檢查痔瘡係就係惡心咗少少，不過應該有另類口味捧場客㗎，保證淫賤黎更加賺到盆滿缽滿！
喂，有言在先喎，呢一條絕世好橋係專為壹淫媒度身訂造，其他傳媒千祈唔好以身試法，尤其係東方報業集團旗下嘅《東方日報》同《太陽報》更加萬萬不可，否則隨時畀人告到甩褲。無他嘅，香港官僚最鍾意玩針對，選擇性檢控離譜到匪夷所思，完完全全係親疏有別。
就好似○五年十二月咁吖，《東方日報》及《太陽報》刊登女星Kelly Brook打格性感照，《蘋果日報》同日刊登同一輯照片，而在港有售嘅外國雜誌《NOW》更係無遮無掩，完全冇打格仔。結果呢，淫審處只將《東方日報》及《太陽報》評為第二類不雅，偏偏放生《蘋果日報》。至於《NOW》咯喎，莫講話唔使罰，連呈交淫審處評級嘅手續都唔見，變相豁免送檢。顯而易見嘞，唔止雙重標準，直情三重標準。
所以話啫，就算壹淫媒播放任何變態短片，如無意外係冇事嘅，相同情節一旦出現喺東方，想唔一身蟻都難！
淫審處同影視處有冇可能一視同仁？可否公平公正對待所有傳媒？唔係話唔得嘅，不過相信要等到所有港英餘孽死清光至有可能咯！