如果租樓住，門口鐵閘溶溶爛爛閂唔埋，梗係快快手搵業主整閘啦。不過，呢個唔係問題嘅問題一涉及政府部門，就會變成噩夢一場。呢，房屋署身為大業主，公屋鐵閘日久失修變廢鐵，居然關人個關，咁嘅房東，都算無良咯。
房署四年前推出嘅「全方位維修計劃」，原來係搵老襯計劃。除咗工程質量為人詬病之外，只重樓宇結構，其他卸得就卸，對安全漏洞詐睇唔到。呢嗱，黃大仙彩虹邨有接近五十年歷史，好多單位嘅鐵閘已經甩皮甩骨，約有五分二住戶嘅鐵閘唔係斷腳、壞鎖，就係甩轆，有啲修無可修，要焊條鐵上去防止冧閘，睇見都牙煙。
講真，彩虹邨近年治安麻麻，入屋爆竊案有增無減，有閘鎖不得，焗住「夜不閉戶」，住戶邊會有好覺瞓吖。住戶紛紛要求房署換閘，改善屋邨保安硬件，死得佢吖，房署居然以資源不足為由拒絕，話鐵閘只修唔換。同樣離譜嘅係，呢頭耍晒手對舊住戶Say no，嗰頭又幫騰空咗嘅單位換閘，擺明玩大細超。
全方位維修變「選擇性搵笨」，難為房署仲好意思吹水話，計劃係為咗提升公屋維修保養服務，令居民有更佳嘅居住環境。中門大開變無掩雞籠，住戶日日擔驚受怕，咁搞法，為不法之徒提供更佳爆竊環境就真。好慳唔慳，不如連公屋保安都慳番吖，笨！
有關注組織負責人批評當局罔顧民意，任由舊邨住戶自生自滅。其實，全部換閘可以節省不斷維修嘅費用，整無可整不如換新嘅。只修唔換，既慳唔到錢，又會令屋邨治安進一步惡化，更會令民怨上升，根本就係屎橋。仲有吖，彩虹邨入伙差不多半個世紀，唔少係長者住戶，而換閘費用不菲，政府縮骨唔肯幫呢啲公公婆婆，等出咗事先去補鑊，遲唔遲啲吖？
話時話，「全方位維修」早已畀人叫做「全謊位維修」啦。除咗工程延誤之外，房屋署仲畀人揭發檢驗敷衍求其，望兩眼就算，有牆紙覆蓋嘅地方連睇都懶睇；有住戶啱啱完成維修，單位內就有石屎從天而降，問你驚未。
講到房署工程漏洞多多，其實點止全方位維修計劃吖。呢，元朗朗屏邨有個住戶，露台天花三、四年前已經滲水，多次向房署求助都冇結果，經年累月下，滲水位置形成多個鐘乳石狀結晶。後來本報將個案轉介，房署「極速」喺一星期內安排維修工程。
所以話，提升屋邨保安質素，房署唔係做唔到，而係根本冇心做。如果因為資源不足唔換閘，署方前排至被踢爆浪費公帑，聘用薪酬較高嘅工程監督職系人員，監管居屋及租者置其屋計劃單位，每年額外支出高達一百三十萬。計功夫茶話齋，呢筆冤枉錢不如攞嚟幫舊公屋換鐵閘，好過揼落鹹水海啦。