唉，醫療事故無日無之，直情好似流血不止，呢頭爆大鑊，嗰頭又闖禍，顧得個頭就甩咗隻髻。今次衰啲乜呢？就咁，衞生署再接獲私家醫院呈報嚴重醫療事故，一名男病人由於腳部骨折必須接受手術，十月十一日喺私家醫院治療期間，醫生以導針固定需要放入螺絲嘅位置，點不知，針嘴斷裂，未能取出，針嘴永遠長留病人體內。
嘩！針嘴留體內，諗起毛管戙！小時候聽老人家講過，一針拮入肉會跟住血管周圍走㗎！不幸之中嘅大幸就係，專家話喎，針嘴好似頭髮咁幼，對病人唔會有乜嘢特別傷害。望係咁望啦，否則醫痛腳變咗天殘腳就該煨咯！
好嘞，既然私家醫院又出事，升斗市民梗係想知係邊間㗎啦，一個唔好彩斷手斷腳要幫襯咯喎，都可以睇定啲吖嘛。哈，死得佢吖，衞生署一次係咁，兩次係咁，餐餐都係咁，硬係打死都唔肯透露係邊間私家醫院，唔使審又係以保障私隱作為擋箭牌。功夫茶真係唔明，唔通庸醫嘅私隱可以凌駕病人權益之上嘅咩？
講開醫療事故，大家記唔記得冇耐之前沙田威爾斯親王醫院開錯藥害死人？大家可能會話，唓，咁鬼死多單，唔知你講邊單喎。唔記得唔緊要，功夫茶提提你，威院醫生開錯薄血藥「華法林」，由於劑量不足導致八十四歲老婆婆無辜辜腦中風死亡。經過事後查證，調查委員會認為事件源自人為及制度因素，包括醫生不熟悉開藥嘅電腦系統，以及系統無法辨識藥單是否完整。委員會就建議嘞，醫生必須接受電腦再培訓。
呢嗱嗱嗱，你話係咪啼笑皆非吖？堂堂一個寒窗苦讀十幾年嘅醫生，居然係一個電腦白癡，真係唔到你唔寫一個服字。
講到呢度，新仇舊恨湧上心頭，試問回歸以來幾多港人同胞命喪庸醫手下？公立醫院如是，私家醫院如是，受害者男女老幼包羅萬有。最幸運嗰個叫做財政司司長曾俊華，由於得到群醫拱照悉心料理，爆血管竟然可以神乎其神火速康復。至於唔屬於權貴一族嘅普通病人咯喎，有得入院未必有得出院㗎，唔覺意心臟病發去到醫院門口都會離譜到見死不救。
對於關乎生死大事嘅醫療問題，民意點睇呢？「東方報業民意調查」顯示，大部分受訪者不滿衞生署表現，三成九受訪者直指係官僚作風導致管理不善；三成二認為本港衞生醫療千瘡百孔；兩成三認為，衞生署表現不佳，導致事故層出不窮。受訪者又認為掌管醫療衞生嘅食物及衞生局局長周一嶽，以及衞生署署長林秉恩應該問責。四成三受訪者認為，呢兩條友仔應該提早落台或者換人；三成二指摘佢哋失職，應受譴責；一成四要求向公眾道歉。
一個周局長，一個林署長，簡直係難兄難弟，夾手夾腳搞到香港醫療系統病到嘔。計功夫茶話齋，順應民意執包袱走啦，唔好阻住地球轉，唔好阻住救病人，積番少少陰德都好吖，唔該！