等功夫茶同大家講一個古仔先吖——
從前從前，有一對父子喎，阿爸七老八十o架喇，阿仔就風華正茂，老虎都打得幾隻。照道理講呢，身為阿仔嘅當然要孝敬老竇啦，以報劬勞之恩嘛。之但係呢個阿仔生性涼薄，一早就訂落家規，佢同老竇講：嗱，老嘢，你一年留喺屋企最少要九十日，唔做得四圍騰玩失蹤o架，否則我當你人間蒸發不再存在，唔會繼續畀錢你做家用。
你知啦，老人家捱騾仔捱足大半世，退休之後梗係有好多心願未了，環遊世界通常係其中之一，阿仔規定一年留喺屋企最少要九十日，咁咪好唔方便？更何況，阿爸其實打算去外國搵番幾十年前「當年相戀意中人、大家性情近」嘅舊相好雙宿雙棲，一年冇可能留喺屋企九十日喎。於是乎，阿爸就懇求阿仔：做下好心啦衰仔，取消呢條咁苛刻嘅家規，你細個時我養大你，到我今時今日風燭殘年，你唔應該懶理老竇死活咁忤逆嘛！
忤逆衰仔左諗諗右度度，終於稍稍良心發現，佢同老竇講：好啦，殺你！留喺屋企九十日嘅規定放寬到六十日啦，你記住乖乖守規矩呀，如果唔係我一個仙都唔畀你！
古仔講到呢度，聰明嘅大家睇怕已經豁然明白功夫茶到底講緊乜。冇錯嘞，忤逆衰仔就係特區政府，唔知點解會有一條不近人情嘅條例，老人家必須符合離港不超過二百四十日，並且居港最少九十日，先至可以獲發全年一萬二千元生果金，否則只能夠領取居港期間嘅津貼。由於條例實在太苛刻嘞，所以受盡千夫所指。
好嘞，忤逆衰仔有乜嘢回應呢？曾蔭權十月發表施政報告話喎，放寬領取生果金嘅離港上限，由每年二百四十日增加至三百零五日，長者最短居港期限由九十日減至六十日。
講真，換轉係功夫茶，一定唔會有任何不孝規定。就好似阿仔供養阿爸咁吖，理得佢係咪永遠離開屋企唔再返轉頭，即使老竇移民咗去火星，你都應該定時定候寄錢畀佢飲茶嘛。難聽啲講句，唔通老人家百年歸老之後，每到春秋二祭你唔燒幾疊金銀衣紙畀佢咯喎？陰陽相隔都尚且敬如在啦，何況香港有五十萬長者生勾勾等住你送上生果金以報劬勞之恩o架！
表面上放寬領取生果金嘅離港上限係知錯能改，可惜只係有姿勢冇實際。根據勞工及福利局向立法會福利事務委員會提交嘅文件指出，截至今年九月底共有超過五十萬名長者領取生果金，每年開支涉及六十三億元，當中約四萬人長時間居住內地或者外遊，只有大概二千人每年留港多於六十日但少於九十日。換言之，新措施嘅受惠人數僅僅二千名長者，漏網之魚數以萬計，政府每年開支增加七百萬元咁大把。
唉，孤寒呢家嘢可能真係難戒過戒煙，坐擁豐厚儲備嘅政府日日畀人鬧係守財奴，之但係佢又死性不改繼續一毛不拔。計功夫茶話齋，人有三衰六旺，而且個個會老，好心曾蔭權政府為人為己，取消生果金離港限制啦，事關冇人保證今日位高權重嘅高級官僚他日會唔會淪落到依靠生果金過活，萬一攞唔到生果金而客死異鄉就眼冤咯！