人間有情，大愛無疆。東方日報慈善基金成立二十五年以來，凝聚社會愛心，展現人性光輝，助人無數，功德無量。一個又一個起死回生嘅奇迹，一段又一段用愛心創造嘅神話，係最寶貴、最值得驕傲嘅銀禧大禮。
天有不測風雲，人有旦夕禍福，不幸隨時會發生喺每一個人身上。東方日報慈善基金成立於一九八五年，每逢發生天災人禍，或者貧困家庭遇上突然變故，基金都秉承救急扶危嘅宗旨，第一時間伸出援手，幫有需要嘅市民渡過難關，為陷於絕境嘅市民帶嚟新嘅希望。
二十五年來，基金得到社會認同，讀者支持，只要登高一呼，便應者雲集，至今為止，捐款人次已經超過六十七萬，籌得善款數字高達四億五千九百多萬元，受惠人次超過一百二十五萬，呢啲就叫人間有愛嘞。
最值得驕傲嘅係，善長仁翁每一分每一毫捐款，都會用喺受助人身上，因為基金所有行政費用同經常性支出，全部由東方報業集團捐贈。亦正因為咁，基金口碑愈來愈好。
基金最令人津津樂道係為無力承擔高昂醫療費用嘅病人提供及時援助，令佢哋重獲新生。呢，基金成立以嚟，單係救活嘅病童就有八十二人，唔少救急個案仲曾經成為全城佳話添。
相信讀者都記得，○四年，當時只有兩歲半嘅明仔飽受腦幹腫瘤折磨，連香港公立醫院都放棄，話佢至多得大半年壽命。明仔父母遍尋名醫，搵到澳洲悉尼一位精於微創手術嘅名醫，不過醫療費同旅費至少要五十萬港元。本報報道咗明仔處境後，讀者爭相捐助，總共籌到八十八萬元，資助明仔飛去澳洲接受手術，健康返回香港，堪稱杏林奇迹。
愛心不斷，奇迹再現。患有罕見先天性單邊肺部發育不全綜合症、一出世就要靠呼吸機生存嘅女嬰蔡文茵，因為本港缺乏呢方面嘅治療技術，家人又無力支付去台灣做手術嘅四十萬元費用，每日都要面對死神嘅威脅。
天無絕人之路，本報七月中報道咗茵茵病情後，東方日報慈善基金同太陽報愛心基金登高一呼，全港甚至全球讀者都積極回應，善款數字累積超過港幣一百八十萬元。成功資助茵茵乘坐醫療包機赴台灣接受手術，擺脫死神魔掌，喺一歲生日前康復出院。
講起太陽報愛心基金，今年亦已經十一歲嘞。呢個基金扶持幼苗，培植棟樑，以青少年為主要服務對象，分別喺學業、醫療及經濟上提供協助，累積籌得善款超過二千萬元，受惠人次達十三萬。太陽報愛心基金同東方日報慈善基金並駕齊驅，互相輝映，相得益彰。
有愛就有希望，東方日報慈善基金二十五年來扶危濟急，獲得社會認同，全賴讀者支持同信任。功夫茶相信，呢份愛心一定會源源不斷繼續落去，大愛無疆界，只要有東方，香港有希望！