唔講大家可能唔知，事關政府從無推廣，原來香港現存至少十四條充滿懷舊風味嘅古道！
講開古道，功夫茶諗起一首好出名嘅元曲，馬致遠嘅《天淨沙．秋思》：「枯藤老樹昏鴉。小橋流水人家。古道西風瘦馬。夕陽西下，斷腸人在天涯。」假如有幸夕陽西下騎馬遊古道，你話係幾咁詩情畫意！
可惜吖，都話政府從無推廣咯，加上負責管理古道嘅漁護署以及地政總署顛三倒四，你一來唔知古道確實位置，即使知道，隨時見到一係日久失修，一係水泥覆蓋，大煞風景之至。
其實，乜嘢叫做古道？顧名思義就係好古老嘅道路，部分歷史可以追溯至三百年前，橫跨西貢、大圍以至九龍。具體嘅鋪路方法係咁嘅，港人祖先利用大量天然卵石併列，石與石之間留半吋空隙，落雨嘅時候雨水自然流入泥土，路面唔會有積水同泥濘，而且唔似得現代水泥路，經年累月都唔會由於冷縮熱脹而爆裂。設計聰明成咁，難怪醉心研究古道嘅退休警司Guy Sanderson Shirra讚不絕口，話係盡現百年智慧。
咦？呢位退休警司睇個名就知唔係華人啦，點解佢老哥研究古道比港人治港嘅華人官員更加「古道熱腸」？嗱，呢啲咪就係叫做諷刺囉，老外當係寶，自己當係草。根據呢位退休警司研究所得，古道設計唔止聰明，而且極具特色。由於古時村民比較迷信，行經古道一怕山賊野獸二怕妖魔鬼怪，所以喺古道起點同終點都會興建寺廟，祈求神靈庇佑吖嘛。好似西貢墟咁吖，就有一座屬於三級歷史建築嘅天后古廟。
既然古道咁有特色，加上潮流興保育，係咪應該珍而重之？冇錯，係好應該嘅，所以不忍古道荒蕪嘅Shirra先生自行收集資料交畀香港考古學會，評定具備人文歷史價值，再於上月呈交古物諮詢委員會列入下一輪評級名單。問題係，連前公務員都睇唔過眼官僚作風，Shirra先生批評古物諮詢委員會主席陳智思想法「好似ＥＯ」，並非專業保育，做事一板一眼。簡單咁講，保育進度慢過蝸牛！
唉，成日都話香港要靠旅遊業食飯，其實現成嘅十四條古道就係最好嘅旅遊景點。如果由功夫茶揸旗話事，一定會同政府咁講：「嗱，你同我死都死掂佢呀！香港旅遊業已經畀強迫購物嘅惡導遊阿珍玩謝，前排仲有內地遊客監生激死，搞到阿爺居然發出『遊港警示』，呢鋪真係唔衰攞嚟衰。亡羊補牢嘅辦法就係開發『尋幽探秘古道遊』，一來夠新鮮，二來咯喎，古道唔係購物大道，咁咪唔會有強迫購物激死遊客嘅尷尬情況囉！」
話時話，保育古蹟呢家嘢，一向都係民間古道熱腸，官方態度冷漠，今次有退休警司建議修葺古道，以地圖標示路徑，會唔會又係熱臉孔貼上冷屁股？保育政策會唔會搞到「斷腸人在天涯」？不如咁啦，功夫茶呼籲，保育人士萬一真係覺得官老爺屁股好冷，一巴掌拍落去，拍到佢滾熱辣！