做生意講誠信，最緊要貨真價實。貨不對辦叫無良，以次充好叫無賴，如果呢啲黑店劏客手法用喺醫療服務，咁就係無良兼無賴。
醫院管理局玩數字遊戲，局方內部文件自賣自誇，指公立醫院服務頂呱呱，○九至一○年度，無論出院人次、急症室求診人次、專科門診以及外展服務嘅服務量都超標完成喎。
冇聽錯吖嘛？一個平時科科肥佬嘅學生，突然間英明神武，科科攞Ａ，如有神助咁，你信唔信吖？嗱，有冇神助就唔知嘞，有錢助就真，原來政府近年大開水喉，不斷向醫管局泵水，三年一共增加咗五十二億元額外撥款。哦，唔怪得啦。
開講有話，錢多好辦事，撥款增加咗，服務量自然水漲船高，超標係應分嘅，有乜值得大吹大擂吖？再講喇，醫療服務人命關天，數量超標固然重要，質量改善更加緊要，醫管局又做唔做得到呢？唉，講起醫療質量就羞家咯，納稅人畀多咗錢，但公立醫院嘅醫療質量就不升反降，市民唔失望就假。
正如全民健康動力主席勞永樂話齋，醫管局提供嘅數據片面、以偏概全，根本就係玩數字遊戲：「睇唔到公院嘅整體服務情況有改善，醫療事故仍頻頻發生，精神科服務輪候時間仲係咁長，社區慘劇有增無減！」真係一語中的。
講真，撥款多咗，如果淨係數量超標，質量肥佬，等於商戶加咗價仲要賣次貨，咁同黑店有乜分別？醫管局嘅所謂「超標」，擺明係搵笨！
嗱嗱嗱！話口未完，因為見死不救而臭名遠揚嘅明愛醫院又有醜聞喇，呢次仲大劑，直頭爆出鑊「私隱浩劫」。該院一個載有三千幾名眼科病人病歷紀錄同個人資料嘅電腦硬碟機，居然不翼而飛，懷疑畀人撬毀拆走，成為公立醫院歷來最嚴重嘅病人資料失竊事件。更離譜嘅係，院方喺事發八日後至報警同通知私隱專員公署，如果話唔係有心隱瞞，細路仔都唔信喇。一間係咁，另一間又係咁，九龍醫院護士學校一名文員月中遺失一隻ＵＳＢ手指，入面儲存咗三百幾位同學嘅個人資料。唉，真係衰開有條路，公立醫院鬥唔見嘢，名副其實係衰鬥衰！
話時話，洩漏病人個人資料，喺公立醫院已係家常便飯，東區醫院、聯合醫院、仁濟醫院、將軍澳醫院同威爾斯親王醫院等等都衰過，有啲仲延遲咗三個月至向上頭報告添。嗱，呢啲就係名副其實嘅超標嘞！
講到超標，有樣衰嘢醫管局認第二，冇人敢認第一。開錯刀、輸錯血、割錯器官、開刀後無啦啦留番塊刀片喺病人肚入面，簡直無奇不有。唔夠勁？滾水淥Ｂ夠嚇人喇啩。總之喺公立醫院，醫療事故五花八門，幾怪都有。仲有吖，急症室要輪候九個鐘頭、專科門診隨時等幾年，唔知呢啲又算唔算超標呢？
醫管局轄下嘅公立醫院，除咗內部管理同服務質量遠遠唔達標之外，凡係靠害病人嘅衰嘢，統統超晒標。計功夫茶話齋，身為問責官員嘅食物及衞生局局長周一嶽，不如揼咗個爛鬼「起錨」襟章，換番個「超錯」牌仔好過啦！