公園水池危機多　官僚保安太粗疏

一呎淺水點解會浸得死人嘅呢？生物學角度：人類作為哺乳類動物係靠口鼻呼吸嘅，假如不幸地臉部朝下浸於水中，莫講話一呎池水，一吋都足以攞命。社會學角度：人類作為群體性動物係靠守望相助嘅，假如唔好彩形單影隻孤伶伶，一旦出事冇人理就非常危險。人類學角度：人類作為性本惡動物係靠自私自利嘅，假如自私鬼覺得救人好麻煩，隨時累及己身，咁就極有可能見死不救㗎喇！

唉，聽講婆婆懷疑中暑暈倒跌落水池遇溺期間，有保安員以「唔識拯溺」為由硬係唔肯出手相救，淨係報警等待「遠水救近火」，白白浪費最關鍵嘅「黃金五分鐘」，證明荀子提倡嘅人性本惡論真係冇錯。如果呢個係事實，功夫茶誠心呼籲相關人等出街記住佩戴裝有避雷針嘅頭盔，事關五雷轟頂呢家嘢好恐怖㗎！

既然一呎水足以致命，香港其他公園水池有冇危險呢？本報記者巡查過多個由康文署以及房屋署管轄嘅公園水池，得出一個非常得人驚嘅結論：危機四伏！

呢嗱，就咁，好似同屬深水埗區嘅通州街公園水池，設計同「氹仔浸蛟龍」嘅事發現場差不多，同樣不設圍欄，而池水更加深，有十九吋半。你知啦，水池冇圍欄可大可小㗎，萬一有小朋友唔識死一嘢跳落去玩水，隨時又會搞出人命。事實上，○七年就發生過一單悲劇，屯門蝴蝶邨有小童不幸跌入水池死亡。

記者又走去黃大仙鳳德公園睇睇，發覺情況大同小異，由於池邊不設圍欄，細路仔輕而易舉就可以爬入去，假如沊一聲跌落水都唔知點算好。

官老爺可能會話，水池不設圍欄係基於美觀需要吖嘛，加咗就唔好睇㗎喇。姑且當你勉強講得通，不過功夫茶想問問，有冇保安員巡視呀？巡視嘅保安員如果見到有人跌落水，識唔識得救人呀？會唔會又係報完警繑埋雙手一味呆等呀？根據記者嘅親身經歷，企足半粒鐘都未見過保安員巡視，浸死蛟龍易如反掌。

簡而言之，公園水池危機多，官僚保安太粗疏。計功夫茶話齋，以後去公園散步最好有三個準備。

一、盡量避免接近水池，開講都有話，欺山莫欺水；二、如果真係想接近水池，帶備潛水用具以防萬一；三、切忌單獨行動，必須結伴同行，出事都有照應吖嘛，千祈唔好咁老襯指望保安員拉你上水，瓜老襯㗎！