醫生補水補兩滴　病人命仔危到極

唔好以為功夫茶杞人憂天，事關醫管局尋日通過一項補償方案，非常之咁唔公平，激到醫生組織生蝦咁跳。睇世界盃都睇得多啦，當一個人好激氣嘅時候，真係會做出難以想像嘅非理性行為㗎，最經典例子莫過於法國隊，球員同教練嘮嘮嘈嘈吵大鑊，士氣低落不似人形，卒之踢到一塌糊塗黯然出局，法蘭西人民簡直當係「國難」。

乜嘢補償方案呢？點解咁唔公平呢？事緣咯喎，公立醫院醫生打官司向醫管局追討超時補水，纏訟足足八年，即係八年抗戰，終審法院去年十月終於裁定，醫生喺休息日以及法定假日等候召喚，即使最終毋須返醫院工作，亦可獲得補償。

既然法庭有令，醫管局當然遵命啦，除非你敢藐視法庭嘅啫。問題係，超時補水補幾多呢？醫管局尋日就宣布嘞，顧問醫生及高級醫生每人最多可獲賠償九萬五千元，初級及前線醫生就只得一萬元。醫管局主席胡定旭話喎，係按照醫生候召嘅頻密程度嚟釐定金額，認為金額合理，相信醫生會理性接受。胡定旭仲話，方案涉及二億五千萬元，會喺日常預算中支付，唔會影響醫院正常服務。

唔知大家點睇，功夫茶就覺得胡主席發噏風囉。喂，係人都知醫院裏面最忙最一頭煙嘅係前線醫生，平時候召最多最冇假放嘅亦係前線醫生，補償金額有乜理由少過高級醫生咁多吖？所以咯喎，前線醫生聯盟批評有關方案不公平，補償金額相差九倍，醫管局搞分化。公共醫療醫生協會主席何栢良同樣咁講，希望醫管局清楚交代計算補償金額嘅方式，補償應該以多勞多得為原則。

唉，講來講去，又係肥上瘦下。做高層嘅，薪高糧準福利好，連超時補水都多人一大截；做低層嘅，捱生捱死冇覺瞓，加薪加條毛，補水補兩滴。

呢家嘢算唔算「貧富懸殊」呢？雖然做得醫生收入唔慌少得去邊，之但係做細嘅一抬頭見到個個大哥大姐發過豬頭，動不動都年薪幾百萬，非常之咁唔忿氣啫！

唔公平係一件事，得人驚又係另一回事。唔該醫管局用下腦諗諗，醫生都係人，同樣有七情六慾，一個唔覺意由於氣憤難平而開錯刀、派錯藥、輸錯血，病人命仔邊個賠呀？

講開又講，公立醫院經常出現「逃亡潮」，一陣話呢個專科集體辭職，一陣又話嗰個專科齊齊「起錨」，會唔會同醫管局肥上瘦下嘅陋習有關呀？計功夫茶話齋，病人命仔危到極，最佳嘅自保辦法始終係健健康康唔好病。