高級程度會考終於放榜咯，如果你考獲幾優幾良，恭喜你前途一片光明；萬一你得到不幸成績，惟有祝你繼續努力。
咪住先，假若考生覺得英文科成績同預期相差太遠，功夫茶有一個建議，第一時間向考評局要求查卷。事關經常甩甩漏漏嘅考評局今年又爆醜聞，閱卷員居然將英文作文科答卷派通街！
你知啦，閱卷評分最緊要保密工夫做到足，絕對唔應該畀人睇，連最親嘅老公老婆仔仔女女都唔得，怕嘅就係唔知邊鬼個百百厭厭左改右改，影響考生成績吖嘛。哈，整鬼佢吖，有一個男教師喎，涉嫌違反保密協議，居然向任教嘅中六學生派發三十份應屆高考生嘅英文作文科答卷，話要指出考生常犯錯誤喎，提醒學生明年應考要特別留意。
唉，功夫茶真係唔明，做得人哋教師，而且兼任閱卷員，應該都讀過幾年書㗎啦，即使未必係天才都唔會係白癡，冇可能唔知道洩漏答卷係幾咁嚴重嘅一件事。如果當事人真係盲毛一條乜都唔知，等功夫茶話過你知，洩露考生答卷有機會干犯《普通法》嘅公職人員行為失當，屬於刑事罪行，一旦罪名成立，洗定八月十五，監都有得你坐！
咦咦咦，唔對路，考評局過往就係因為太多甩甩漏漏，遺失試卷又有，畀錯評分都有，所以申訴專員公署狠狠伸咗佢哋一腳，伸到口腫鼻腫樣衰衰嗰隻，然後考評局急急補鑊，動用超過一億元公帑更新電腦系統，實行中央電子評卷。既然係電子評卷，理論上應該密密實實至啱，點解仲會洩露答卷嘅呢？原來有人甩漏成性，習慣成自然，中央電子評卷尚未百分百投入運作㗎，仍然有部分答卷需要人手操作，所以就出事嘞。
好嘞，考評局到底知唔知有閱卷員洩露答卷嘅呢？如果知道，有冇嘗試防止考生利益受損嘅呢？哈，本來考評局係秘而不宣嘅，不過一發覺消息靈通嘅《東方日報》同《太陽報》記者正在窮追猛打跟進調查，考評局如夢初醒突然召開記者會交代，仲話報警處理添。至於點解冇通知受影響考生，藉口係「唔想騷擾」喎。
唉，喺香港求學讀書真係好痛苦，一試定生死已經令人忐忑不安啦，變來變去嘅教育制度又叫人無所適從，再加上醜聞停不了嘅考評局，一時呢樣搞錯，一時嗰樣亂嚟，簡直永無寧日。話時話，教育官僚玩到學生哥陀陀擰，校園吸毒問題或者多多少少都有因果關係。
計功夫茶話齋，申訴專員公署伸一腳係唔夠嘅，不如瞄準考評局老爺奶奶八月十五伸多兩腳甚至三腳，伸到考生可以安心讀書，唔使擔心考試成績無端端「降呢」為止。
咁啱今日七一遊行，不如搵人高呼口號：打倒混帳考評局！還我書中顏如玉！