烈日當空，香港熱辣辣，尋日氣溫再破今年紀錄，升到接近三十三度，部分地區甚至高達三十五度，問你怕未。最慘就係搵食司機，大熱天時通街撲，冷氣開細啲都唔掂，如果響應政府呼籲停車熄匙咯喎，直頭係搵自己條命較飛，同自殺冇乜分別。
呢嗱，有位八十一歲小巴司機就係因為響應政府號召，尋日中午喺旺角一個小巴站頭閂咗冷氣等客，結果懷疑因為天氣悶熱而中暑暈倒，被行家發現送院救治，情況危殆。大家諗吓，當時車廂內氣溫高達攝氏四十三度，後生仔都頂唔順啦，何況年過八旬嘅老伯？
唉，一把年紀仲要揸架小巴頂住烈日開工，已經夠辛苦啦，政府唔單止冇體恤民情，諗辦法幫職業司機消暑，仲阿茂整餅，無事生非，叫司機停車熄匙，你話係咪靠害吖。耆英司機誤信政府，諗住為環保盡一分力，點知差啲變咗為環保獻身，信者失救，真係夠晒諷刺。
停車熄匙法例未實施已經有司機被焗暈，如果日後正式推出，都唔知仲有幾多人中招，唔怪得運輸業界紛紛要求當局擱置呢條擾民法例喇。講真，自從當局諗出呢條屎橋以來，業界一直強烈反對，最為人詬病嘅係，停車熄匙根本唔符合本港實際情況，尤其對於的士、小巴呢啲搵食司機嚟講，夏天停車熄匙，外面氣溫三十幾度，車廂內溫度分分鐘高達四、五十度，唔止趕客，直情攞命，唔出事至奇。
弊在當局擇惡固執，有業界人士建議遇到炎熱潮濕天氣應該豁免停車熄匙，但高官話考察過實施同類法例嘅加拿大等國家，相信唔會有問題喎。唉，世界咁大，當局偏偏揀風涼水冷嘅加拿大嚟比較，簡直係九唔搭八。
就算唔講豁免嗰筆，早排有運輸業界人士提出，如果當局堅持立法，至少應增加配套設施，協助業界「避暑」，譬如喺小巴同的士站加設上蓋，喺旅遊巴交匯處建有蓋停車場，等車輛唔使變「桑拿房」甚至「焗爐」。但環境局高官好似借咗聾耳陳隻耳咁，一於當聽唔到。
喂，你班高官成日坐喺冷氣房，叫搵食司機三、四十度高溫下焗桑拿，點講都唔通啦。停車熄匙講得下巴輕輕，你哋又敢唔敢自己試吓先吖？呢，環境局局長邱騰華曾試過去完立法會行路返政府總部，扮到好似好環保咁，但事後被踢爆佢嘅座駕空車駛番去，咪一樣係排廢氣，環乜鬼保呀，做騷就真。
其實，想做騷都仲有機會嘅，邱騰華早排答應業界會喺高溫日子親自坐上停車熄匙嘅的士，體驗「焗桑拿」嘅滋味，有人建議佢呢個月廿三日大暑當日試坐。嗱，到時大家一定要實呀，為防萬一，大家不妨送份既實惠又實用嘅禮物畀邱局長：救命平安鐘一個。