既怕滅鼠不力　更怕狡辯低能

先睇睇外國老鼠問題有幾嚴重。美國喎，金融重鎮紐約鼠患成災，重災區係地鐵站，街頭隨處可見老鼠交配。大街大巷公然交配固然係極之不雅嘅淫褻行為，更加令人不安嘅係，老鼠交配唔會用安全套㗎，嘿咻嘿咻嘅後果係宗族繁衍生養眾多。你知啦，老鼠生殖能力強到冇朋友，又冇一夫一妻制約束，呢頭濫交完畢，嗰頭生出一竇。亦即係話，今日人不殺鼠，明日鼠多過人。

好衰唔衰，紐約市衞生當局本末倒置，唔去增加滅鼠人手，反而大幅裁員，原本八十四人減剩二十七人。難怪紐約州參議員批評，政府削支等於向老鼠發出邀請卡，任由傳播病毒。

至於印度嘅孟買，滅鼠決心比紐約大得多，不過手法就原始咗少少。孟買市政府大量增聘打鼠敢死隊，因為漏夜出動，所以名為夜之打鼠隊，全人手操作見鼠殺鼠，唯一保護裝備係一對膠手套。所謂全人手操作，不外乎兜頭兜腦一棍摳落去，或者捉住鼠尾凌空一嘢撻落地。更加具體嘅細節唔講嘞，費事血肉橫飛搞到大家冇晒胃口。聽講，孟買平均每人三粒鐘可以殺鼠三十隻，重量級殺鼠天王可以搞掂六十隻。之不過咁，即使打鼠敢死隊擁有豐功偉績，佢哋都唔夠膽講呢一場人鼠大戰可以取勝，事關老鼠之多確係數之不盡，殺咗一隻仲有千千萬萬隻。

好嘞，睇番香港，老鼠咬人唔係新聞，因為幾乎無日無之，比較特別嘅係有一位非常倒楣嘅仁兄，居然連續淪為老鼠點心，咬完左腳，再咬右腳，萬一下次咬埋「中腳」，咁就變咗大新聞！

喂喂喂，又話港產官僚砌詞狡辯嘅，狡成點呀？食衞局副局長梁卓偉係咁講嘅，老鼠藥即係薄血藥，食咗會失血，失血會口渴，口渴會咬人；因為呢，老鼠食咗藥，所以呢，就會咬人嘞。根據梁卓偉嘅邏輯，老鼠咬人唔代表滅鼠不力，反而係食環署立大功嘅優秀表現，唔係佢哋準確落藥，市民就唔會遇襲啦！

如果大家唔覺係狗屁不通嘅歪理，功夫茶真係無言以對。大佬，老鼠藥唔係應該食到老鼠口吐白沫瓜老襯嘅咩？食完非但唔使死，反而龍精虎猛通街狂咬，功夫茶想問一問梁副局，你嗰隻老鼠藥喺邊度買㗎？有冇買錯過期春藥呀？定係畀人用山寨假貨搵笨都唔知呀？

其實，使鬼諸多藉口搪塞咩，如果功夫茶係梁卓偉，一句講晒，天要下雨，娘要嫁人，鼠輩橫行見人就咬係地球史上億萬年來最自然不過嘅正常現象，全世界都係咁，香港冇辦法獨善其身。即係咁，既怕滅鼠不力，更怕狡辯低能，醜死怪吖嘛！

可能係英雄所見略同，睇怕申訴專員同樣極之討厭政府部門低低能能敷衍塞責。申訴專員黎年發表任內第一份年報，由食衞局局長周一嶽統領嘅食環署位列投訴榜首。

唉，呢隻人形過街老鼠食咗藥之後唔知又會唔會咬人嘅呢？會就真係大新聞咯！